Frá Alþingi. Þingfundir víkja fyrir nefndarstörfum flesta daga í þessari viku. mbl.is/Golli

Eftir Ómar Friðriksson omfr@mbl.is

Stíft er fundað í utanríkismálanefnd þessa dagana um ályktunartillögurnar tvær um aðildarumsókn að ESB. Tillögu ríkisstjórnarinnar um aðildarumsókn að ESB og tillögu framsóknar- og sjálfstæðismanna um undirbúning mögulegrar umsóknar um aðild að ESB. Fundað verður nánast dag hvern í þessari viku en að sögn Árna Þórs Sigurðssonar, formanns nefndarinnar, er ljóst að nefndin mun þó ekki ljúka umfjöllun um tillögurnar fyrr en eftir mánaðamótin.

Nokkrir tugir gesta hafa komið fyrir nefndina, rætt hefur verið við fulltrúa hagsmunasamtaka, stofnana og ráðuneyta. Í seinustu viku rann út frestur til að skila inn umsögnum við tillögurnar. Liggja fyrir samtals 108 erindi, sem nefndarmenn fara yfir en í mörgum tilvikum er um samhljóða umsagnir að ræða við tillögurnar tvær. Má því ætla að raunverulegur fjöldi umsagna sem borist hafa sé um 60.

Að sögn Árna Þórs hefur nefndin tekið á móti gestum alla síðustu viku. „Við erum því ekki byrjuð að vinna í tillögunum sjálfum heldur höfum aðallega verið að leita eftir viðhorfum og ábendingum.“ Árni Þór segir nefndarmenn reyna að átta sig á hvort ná megi samstöðu um málsmeðferðina burtséð frá afstöðu manna til aðildar að ESB. Spurður hvort reynt væri að tvinna tillögurnar saman í eina, eins og lagt er til að gert verði í mörgum umsögnum, sagði hann að unnið væri í því.

Margar umsagnir hafa þegar verið birtar á vef þingsins og kemur fátt þar á óvart. Þar endurspeglast ágreiningurinn í þjóðfélaginu um hvort sækja eigi um aðild. ASÍ og flest aðildarsamtök þess hvetja eindregið til aðildarumsóknar. Í umsögn Starfsgreinasambandsins segir að á vettvangi þess hafi komið fram mikilvægi þess að aðildarviðræður einar muni leiða fram raunverulega kosti og galla beinnar aðildar. Því sé mikilvægt að hefja aðildarferilinn sem fyrst. MATVÍS tekur í sama streng og hvetur til aðildarumsóknar en gagnrýnir að tillaga stjórnarandstöðu virðist sett fram til þess eins að tefja aðildarumsókn ,,og halda okkur enn lengur í fjötrum gagnslítils gjaldmiðils [...]“. BSRB slær nokkuð annan tón en félagarnir í ASÍ. Bandalagið hefur enn ekki tekið afstöðu til aðildar að ESB en lýsir sig sammála mati á grundvallarhagsmunum landsins sem fram kemur í tillögu ríkisstjórnarinnar.

Komi sér saman um eina tillögu

Samtök atvinnulífsins eru klofin í afstöðu sinni til ESB-aðildar. Í umsögn SA segir að skiptar skoðanir séu innan samtakanna um aðild Íslands að ESB og að SA muni gæta hagsmuna allra aðildarfélaga á grundvelli þess. LÍÚ er andvígt aðildarumsókn en Samtök iðnaðarins eru á öndverðum meiði og vilja aðild. Samtök ferðaþjónustunnar skora á þingmenn að koma sér saman um eina tillögu í stað tveggja. Landssamband kúabænda leggur til að þingið hafni báðum tillögunum.