Lárus Finnbogason. mbl.is/Eggert

Lárus Finnbogason, formaður skilanefndar Landsbankans, segir að endurskoðað mat á útlánasafni Landsbankans sé raunsætt en hvorki bjartsýnt né svartsýnt. Niiðurstaða skilanefndarinnar er að verðmæti allra eigna bankans í hinn 30. apríl hafi verið um 1100 milljarðar króna.

„Það verður auðvitað að taka tillit til þess að lökustu útlánin voru skilin eftir í eignasafni gamla bankans. Óvissan er auðvitað gríðarlega mikil, ég vil leggja áherslu á það, bæði hvað varðar útlánasafnið og eignamatið í heild sinni. Allar tölur geta breyst, hvort sem það er upp á við eða niður," sagði Lárus. Skilanefndin kynnti endurskoðaða matið fyrir efnahags- og skattanefnd Alþingis í dag.

Verðmæti eigna bankans var í febrúar talið vera 1195 milljarðar krónar en og hefur því rýrnað um 95 milljarða króna. Lárus sagði, að gengisþróun krónunnar hefði haft áhrif og einnig hefðu eignasöfnin rýrnað vegna efnahagsþróunarinnar. 

Yfir 25% af heildareignum bankans er greiðsla, sem á að koma frá nýja bankanum til þess gamla. Verið er að semja um þessa fjárhæð en hún er háð mikilli óvissu og hefur ekki breyst því hún byggist á mati sem gert var þegar skiptingin átti sér stað í október.  

Verið er að vinna mat á á eignum bankanna og talan mun breytast þegar niðurstaða kemur úr þessu mati 17. júlí að loknum viðræðum við kröfuhafa.

Lárus sagði, að þar sem þetta væri svo stór hluti heildareigna skapi það mikla óvissu.  Heimtur á útlánasafni bankans erlendis væru hins vegar mjög góðar, til dæmis allt upp í 95% í Kanada þótt sá hluti sé auðvitað ekki stór.  

Bil milli eignasafns og skuldbindinga vegna Icesave reikningana væri samkvæmt þessu um 250 milljarðar. Lárus sagði að reiknað væri með, að um helmingur lendi á íslenska ríkinu en hinn helmingurinn muni lenda á Bretum og Hollendingum.