Sólstöðuganga í Öskjuhlíð. mbl.is/Jakob Fannar

Landinn var á faraldsfæti um helgina og gönguhópar víða á ferð. Í gærkvöldi, á lengsta degi ársins, var farin sólstöðuganga um Öskjuhlíð í Reykjavík þar sem Þór Jakobsson veðurfræðingur var leiðsögumaður.

„Við köllum þetta meðmælagöngu með lífinu og menningunni. Mótmæli geta vissulega verið ágæt en það léttir lundina að vera úti í náttúrunni, sjá eitthvað fróðlegt og hitta mann og annan,“ segir Þór sem nú fór í 25. sinn fyrir sólstöðugöngu. Gönguferðir undir sömu formerkjum voru farnar víðar á landinu í gær, svo sem austur í Skálholti og norður í Þingeyjarsýslum.

Rúmlega 250 manns gengu með Ferðafélagi Íslands á Snæfellsjökul á föstudagskvöld. Lagt var á brattann við rætur jökulsins síðla kvölds og efsta hjalla náð um klukkan eitt um nóttina. Í áfangastað kom hópurinn til baka á óttunni, síðari hluta nætur.

„Þetta var stórkostleg upplifun. Við urðum vitni að því hvernig kyrrð færðist yfir allt um miðnæturbil og síðan hvernig landið vaknaði sem úr dvala þegar sólin kom aftur upp í stórkostlegri sinfóníu litbrigða jarðarinnar,“ segir Páll Guðmundsson framkvæmdastjóri FÍ, sem var meðal fararstjóra.

Páll segir að líkast til hafi aldrei jafnstór hópur gengið í einu á eitt af hæstu fjöllum landsins svo sem Snæfellsjökul, sem er 1.446 metrar á hæð. Mikla þátttöku segir hann endurspegla áhuga landans á útiveru og fjallaferðum. Þátttaka í ferðum FÍ hafi sjaldan verið jafnmikil og einmitt nú í sumar.

Um 140 manns tóku þátt í árlegri Jónsmessugöngu Útivistar yfir Fimmvörðuháls aðfaranótt laugardags. Fararstjórar og björgunarsveitarmenn fylgdu hópnum, sem í það heila var um 200 manns. Veður og aðrar aðstæður í ferðinni voru allar hinar ákjósanlegustu. „Fyrstu göngugarparnir komu hingað um klukkan fimm um morguninn og þá tókum við á móti fólki með lýsissnafsi eða Gammel Dansk. Fleiri völdu lýsið, því fæstir þurftu áfengi. Bros var á sérhverju andliti og ekki ofsagt að fólk hafi verið ölvað af náttúruvímu eftir ferðina,“ segir Ingi Bragason, skálavörður Útivistar í Básum.

sbs@mbl.is