Sigríður I. Ingadóttir vill að stórn bankanna færist fjær áhrifasviði stjórnmálamanna.

Það eru fleiri en stjórnarandstöðumenn sem óttast að frumvarp um Bankasýslu ríkisins, sem Steingrímur J. Sigfússon, fjármálaráðherra, mælti fyrir á Alþingi í dag, gangi ekki nógu langt í því að fjarlægja bankana frá áhrifasviði stjórnmálamanna.

Sigríður I. Ingadóttir, þingmaður Samfylkingarinnar, sagði á Alþingi að hún fagnaði því að ríkið hygðist fela sérstakri stofnun eignahlut sinn í bönkunum sem myndi stuðla að ákveðinni fjarlægð frá hinu pólitíska valdi.

Sigríður vildi þó fá umræðu um það í viðskiptanefnd þingsins hvort eignarhaldsfélag eða opinbert hlutafélag (ohf.) gæti ekki verið heppilegra fyrirkomulag heldur en ríkisstofnun.

„Eignarhaldsfélag væri bæði fjær hinu pólitíska valdi og myndi takmarka fjárhagslega ábyrgð ríkisins," sagði Sigríður sem bætti því við að sænski bankasérfræðingurinn Mats Josefsson, formaður nefndar um endurreisn fjármálakerfisins, hafi einmitt talið hentugra að eignarhald ríkisins sé í opinberu hlutafélagi fremur en stofnunum.