Héraðsdómur Reykjavíkur. Ómar Óskarsson

Héraðsdómur Reykjavíkur hefur dæmt karlmann á þrítugsaldri í 6 mánaða fangelsi, þar af 3 mánuði skilorðsbundið, fyrir kynferðisbrot gegn stúlku. Maðurinn var einnig dæmdur til að greiða stúlkunni hálfa milljón króna í bætur.

Maðurinn var ákærður fyrir að hafa farið óboðinn inn í svefnherbergi til stúlku og m.a. káfað þar á henni. Þetta gerðist í september í fyrra.

Fram kemur í niðurstöðu dómsins, að sú fullyrðing mannsins að ekki hafi neitt kynferðislegt búið að baki för hans í svefnherbergið sé ósennileg þegar til þess er litið að hann fór óboðinn inn í svefnherbergi til stúlku sem hann þekkti ekkert og var þar í fastasvefni og afklæddist.

Þá fái heldur ekki staðist, að ekkert kynferðislegt hafi búið að baki þeirri spurningu, sem maðurinn beindi til stúlkunnar við þær aðstæður: „Ertu til í kallinn?"

Taldi héraðsdómur framburð mannsins ótrúverðugan en framburður stúlkunnar sé á hinn bóginn trúverðugur og ekkert hafi komið fram sem rýri þann trúverðugleika en stúlkan sagðist hafa vaknað við að fáklæddur karlmaður hafi staðið nærri rúmi hennar og síðan kysst hana á hálsinn og káfað á henni utanklæða.