Mats Josefsson. mbl.is/Kristinn

Sænski sérfræðingurinn Mats Josefsson setti engin skilyrði fyrir áframhaldandi starfi fyrir íslensk stjórnvöld en kom þeirri skoðun sinni skýrt á framfæri við stjórnvöld, að það fyrirkomulag sem upphaflega var sett upp varðandi enduruppbyggingarstarfið í bankamálum hafi ekki verið eins skilvirkt og stefnt var að.

Þetta kemur fram í svari Jóhönnu Sigurðardóttur, forsætisráðherra, við fyrirspurn Eyglóar Harðardóttur, þingmanns Framsóknarflokksins á Alþingi.

Eygló spurði hvaða skilyrði Josefsson hefði sett fyrir áframhaldandi starfi í samræmingarnefnd um endurreisn bankakerfisins þegar hann hótaði að hætta sem formaður nefndarinnar vegna megnrar óánægju með hægagang við endurskipulagningu bankanna.

Í svarinu segir, að frá lokum ársins 2008 hafi verið starfandi svonefnd samræmingarnefnd í bankamálum sem Mats Josefsson stýrir og sú nefnd hefur haldið vikulega fundi. Í þessari nefnd hafa setið auk Mats fulltrúar forsætisráðuneytis, fjármálaráðuneytis, viðskiptaráðuneytis, utanríkisráðuneytis, Fjármálaeftirlitsins og Seðlabanka Íslands.

Í maí hafi verið ákveðið í fullu samráði við Mats Josefsson að breyta fyrirkomulagi þessara mála á þann hátt, að í stað samræmingarnefndarinnar yrði settur á laggirnar tímabundinn stýrihópur um endurreisn bankakerfisins. Segir í svari Jóhönnu, að megintilgangur þessarar breytingar sé að styrkja framkvæmd endurreisnarstarfsins enn frekar nú þegar nær dragi þeim tímapunkti, að ríkið leggi nýju bönkunum til nýtt eigið fé þegar samningum við kröfuhafa gömlu bankanna lýkur.

Stýrihópurinn hefur fundað að jafnaði þrisvar til fjórum sinnum í viku. Í stýrihópnum sitja, auk Josefssonar, seðlabankastjóri, sem stýrir starfi nefndarinnar, fulltrúi forsætisráðuneytis og fjármálaráðuneytis auk aðstoðarmanna forsætis-, fjármála- og viðskiptaráðherra.

Segir Jóhanna, að með þessu nýja fyrirkomulagi í þessum málum sé brugðist við ábendingum Mats Josefssonar um skort á skilvirkni.