Alþjóðahvalveiðiráðið vill færa sig nær vinnubrögðum Sameinuðu þjóðanna og ná þannig fram sátt í ráðinu. Hvalveiðar Íslendinga ekki verið gagnrýndar. Rætt um að leyfa takmarkaðar veiðar. Mögulegt að verslun milli landa með hvalaafurðir verði bönnuð.

Sáttatónn á fundinum

Tómas H. Heiðar, aðalfulltrúi Íslands í Alþjóðahvalveiðiráðinu segir sáttatón hafa verið á fundi ráðsins sem lauk á Madeira í gær. „Það kom til dæmis ekki fram nein gagnrýni á hvalveiðar Íslendinga,“ segir Tómas .

Tólf lykilríkjum hefur verið falið að leita að málamiðlun milli hvalveiðisinna og andstæðina og er Ísland í þessum hópi.  Önnur ríki eru: Bandaríkin, Japan, Nýja-Sjáland, Ástralía, Svíþjóð og Þýskaland fyrir hönd ESB, Brasilía, Mexíkó, Kamerún, Antígva og Barbúda og eyríkjasambandið St. Kitts og Nevis. Fyrir hópnum fer nýkjörinn formaður alþjóðahvalveiðiráðsins, Cristian Maquieira frá Chile. 

Færa sig nær vinnubrögðum SÞ

Árni Finnsson, formaður Náttúruverndarsamtaka Íslands, segir að fátt hafi komið á óvart á fundi ráðsins. Ekki hafi verið búist við niðurstöðu um framtíð ráðsins. „En menn vilja greinilega færa sig nær vinnubrögðum sem tíðkast innan SÞ þar sem niðurstaða fundar byggir á sameiginlegri niðurstöðu í stað þess að fundir endi á atkvæðagreiðslu þar sem hópur ríkja ber önnur ríki ofurliði,“ segir Árni. Nú eigi að reyna að finna leiðir til þess að sameiginleg niðurstaða aðildaríkja verði möguleg og að mikill meirihluti verði sáttur við niðurstöður. „Þannig ætti að verða auðveldara að stjórna hvalveiðum og nýtingu hvala, hvort sem það eru veiðar, hvalaskoðun eða eitthvað annað.“

Millilandaverslun með hvalaafurðir mögulega bönnuð

Hvað varðar þá hugmynd sem reifuð hefur verið óformlega á fundinum og gengur út á það að leyfa takmarkaðar hvalveiðar, til dæmis strandveiðar, segist Árni hafa heyrt hana talsvert rædda. Eitt af því sem hefur verið mikið nefnt ef þannig veiðar verða leyfðar er að verslun með hvalaafurðir milli landa verði bannaðar. „Þá yrði minni hvati til mikilla veiða,“ segir Árni. Hann segir ómögulegt að spá fyrir um hvort þetta verður ákveðið eða ekki.

Einnig hefur verið rætt um að veiðum í vísindaskyni verði hætt, enda hafi Japanir þótt misnota þær verulega og hvalveiðum sé því í raun ekki stjórnað af ráðinu.

Ársfundinum lýkur á morgun.