Erfitt getur verið að staðfesta hvort um gegnheilan eðalmálm er að ræða ef enginn er hreinleikastimpillinn. mbl.is/Þorkell

Neytendastofa varar við farandsölumönnum. Í tilkynningu Neytendastofu segir að varhugavert sé að kaupa raftæki af vafasömum uppruna og skartgripi sem sagðir eru úr ekta gulli en erfitt getur verið að staðfesta slíkt á útidyratröppunum.

Varðandi raftæki þarf sérstaklega að athuga hvert eigi að leita komi upp galli eða önnur vandamál með vöruna og hvort ábyrgð sé ekki að minnsta kosti tvö ár. Einnig þarf kaupandi að gæta að því að raftækið sé CE-merkt.

 Í tilkynningu frá Neytendastofu segir: „Skartgripir úr eðalmálmi sem seldir eru á Íslandi eiga samkvæmt lögum að vera merktir með hreinleikastimpli og nafnastimpli. Markmiðið með lögunum er m.a. að vernda neytendur fyrir svikum. Fólk þarf að hafa í huga að þegar það kaupir skartgripi að ekki er hægt að sjá hversu mikið magn af eðalmálmi þ.e. gulli, silfri, palladíum og platínum sé í þeim með því einu að snerta hlutinn eða horfa á hann.

Eina staðfestingin á því hversu mikið hlutfall eðalmáls er í hlutnum er þriggja tölustafa hreinleikastimpill, sem segir til um þann hreinleika sem seljendur lofa við sölu á vörunni.  Skartgripir þurfa einnig að hafa nafnastimpill sem segir til um hver sé framleiðandi eða innflytjandi vörunnar en hann ber ábyrgð á vörunni og að hún samræmist kröfum.

Um farandsölu gilda meðal annars lög um húsgöngu- og fjarsölu sem eiga að tryggja neytendum vernd og lágmarksréttindi.

Ábendingum vegna mögulegra brota á reglum um farandsölu má koma til Neytendastofu í gegnum rafræna Neytendastofu."