Ragnheiður Thorsteinsson segist hafa kysst þennan stóra hæng bless og þau hafi sammælst um að hann skyldi strauja beint upp á fjall svo hann geti dúllað sér þar með flottri hrygnu.

Þennan væna fisk tók ungur Dani í landi Haga og notaði til þess Black Ghost-straumflugu. Það tók hann um hálftíma að landa laxinum. Ekki var viðureignin átakalaus því stöngin brotnaði í látunum.

Laxveiðin hefur farið vel af stað. Þannig náðist 31 lax fyrsta daginn sem veitt var í Víðidalsá.  Ragnheiður Thorsteinsson var við veiðar í Langá á Mýrum um helgina. „Við fengum þrjá. Það gekk ágætlega. Það komu 7-8 fiskar á morgnana en yfirleitt rólegra seinnipartinn."

Ragnheiður sagði veðrið hafa verið alltof gott fyrir veiði, sólin skinið glatt og hiti farið yfir tuttugu gráður. „Laxinn er kominn ótrúlega langt upp eftir ánni, það er fiskur út um allt þarna. Mér finnst ótrúlega skrítið að vera með þessa maðkaveiði í byrjun sumars. Það er fullt af fólki búið að maðka alla þessa flottu staði áður en maður kemur að þeim.« sagði Ragnheiður, sem aðeins veiðir á flugu.

Hún lét þetta þó ekki slá sig út af laginu og setti í stórlax. „Ég náði honum í hyl sem heitir Bárðarbunga og er númer 31 og hálft. Það hafði sést fiskur þarna. Svo á slaginu hálfellefu tók hann hjá mér rauða Frances-keilu og ég barðist við hann í tuttugu mínútur. Hann var nýgenginn með halalús eftir öllum hryggnum. Hann var svo sterkur og áin er straumhörð þarna, ég var gjörsamlega búin á því! Þetta var ógeðslega skemmtilegur fiskur. Svo þegar hann var búinn að berjast við mig, eða ég við hann, þá sá ég að blæddi pínulítið úr honum. Ég sá fluguna aftast í tungunni á honum og klippti bara á tauminn og sleppti honum."