Ögmundur Jónasson, heilbrigðisráðherra, Dag Terje Andersen, atvinnumálaráðherra Noregs, Árni Páll Árnason, félags- og tryggingaráðherra, Rósa Samuelsen, félagsmálaráðherra Færeyja, Maria Larsson, heilbrigðisráðherra Svía, og Bjarne Håkon Hansen, heilbrigðisráðherra Noregs.

Á tímum efnahagssamdráttar er eitt mikilvægasta verkefni stjórnvalda að draga úr atvinnuleysi og styrkja velferðarkerfið. Var þetta meginþema ráðherrafundar Norðurlandanna í dag. Þá voru framtíðaráherslur samstarfsins á sviði velferðarmála ræddar

Þetta sjónarmið var norrænu félags- og heilbrigðisráðherrunum ofarlega í huga, þegar þeir ræddu afleiðingar efnahagssamdráttar á félags- og heilbrigðisþjónustu landanna, en þetta var megin þema ráðherrafundarins.

Fram kom t.d. hjá finnska heilbrigðisráðherranum og sænska félagsmálaráðherranum að afleiðingar atvinnuleysis hefðu orðið langvarandi í löndunum og sögðu það mikilvægt, að huga sérstaklega að atvinnustigi ungs fólks á krepputímum.

Norrænu ráðherrarnir skiptust á skoðunum um ástand mála í löndunum, sem öll glíma við afleiðingar efnahagssamdráttar sem þó er mismikill eftir löndum.

Norrænu félags- og heilbrigðisráðherrarnir leggja áherslu á að efla samstarf sitt á sviði fyrirbyggjandi aðgerða á heilbrigðissviði og að huga sérstaklega að þjóðfélagshópum sem við þessar aðstæður eiga á hættu að lenda utanveltu í samfélaginu.

Á fundinum voru framtíðaráherslur samstarfsins á sviði velferðarmála ræddar og lögðu menn áherslu á að styrkja velferðarkerfin á tímum alþjóðavæðingar og vaxandi samkeppni á öllum sviðum.

Norræna velferðarstofnunin í Stokkhólmi var kynnt sérstaklega og var nýr forstöðumaður hennar kynntur, en löndin öll binda miklar vonir við starfsemi hinnar nýju stofnunar.

Árni Páll Árnason, félags- og tryggingamálaráðherra, og Ögmundur Jónasson, heilbrigðisráðherra, buðu til fundarins, en fimm starfsbræður þeirra annars staðar af Norðurlöndum sóttu fundinn, tveir frá Noregi, frá Svíþjóð, Finnlandi, og frá Færeyjum.

Sjá meira á vef heilbrigðisráðuneytisins.