Bæjarráð Hveragerðisbæjar mótmælir harðlega þeim yfirlýsingum sem fram hafa komið um frestun framkvæmda við tvöföldun Suðurlandsvegar sem hefjast áttu á þessu ári og að aðrar framkvæmdir verði settar framar í forgangsröðina.

Í bókun bæjarráðs frá því í morgun segir að það sé með öllu óskiljanlegt að ráðherra skuli ganga á bak orða sinna sem féllu á fundi með sveitarstjórnarmönnum Suðurlands þann 25. mars síðastliðinn.

„Að bera því við að skipulagsmálum sveitarfélaganna sé um að kenna er ekki eingöngu óskiljanlegt heldur fráleitt með öllu. Á umræddum fundi í mars kom skýrt fram hjá bæði ráðherra og Vegamálastjóra að skipulagslega væri ekkert því til fyrirstöðu að hefja framkvæmdir við fyrstu áfanga tvöföldunar strax í haust. Skipulagsvinnu Ölfusinga er lokið og Hvergerðinga er á lokastigi vegna vegarins á leiðinni frá Litlu kaffistofu að Hveragerði og ekkert því til fyrirstöðu að bjóða út þá áfanga strax í haust,“ segir í bókun bæjarráðs Hveragerðisbæjar.

Ráðið ítrekar fyrri bókanir Hvergerðinga vegna nauðsynjar þess að í tvöföldun Suðurlandsvegar verði ráðist nú þegar.

„Löngu er komið fram að vegurinn milli Hveragerðis og Selfoss er hættulegasti vegkafli landsins um það er ekki deilt. Umferðarþungi er einnig með þeim hætti að núverandi Suðurlandsvegur ber hann ekki, hvað þá þegar allri umferð vegna nýrrar Bakkafjöruhafnar verður beint á veginn í óbreyttri mynd. Því er það skýlaus krafa bæjarráðs Hveragerðisbæjar að ekki verði horfið frá fyrri áformum um tafarlausa tvöföldun Suðurlandsvegar og fyrstu áfangar verksins boðnir út á haustmánuðum,“ segir í bókun bæjarráðs.