Dæmdur fyrir líkamsárás og líflátshótanir
mbl.is
Héraðsdómur Suðurlands hefur dæmt karlmann á fertugsaldri í fjögurra mánaða fangelsi fyrir líkamsárás á fyrrum sambýliskonu sína og barnsmóður á heimili hennar þar sem þrjú ung börn þeirra voru. Þá réðist maðurinn á lögreglumenn og hótaði þeim lífláti.
Maðurinn var ákærður fyrir að hafa að kvöldi 22. september 2008 ruðst í heimildarleysi inn á heimili fyrrverandi sambýliskonu sinnar, ýtt við henni með ógnandi hætti og hótað henni lífláti og gripið með höndunum um háls og kverkar hennar og hert að, með þeim afleiðingum að hún hlaut bólgu, eymsli og húðhrufl vinstra megin á hálsi og húðrispu á holhönd.
Þá var maðurinn ákærður fyrir eignaspjöll en hann eyðilagði síma konunnar. Ennfremur var maðurinn ákærður fyrir brot gegn valdstjórninni, með því að hafa skömmu eftir árásina á konuna, ráðist með ofbeldi að lögreglumanni, sem var að gegna skyldustörfum.Maðurinn greip með höndunum um háls og kverkar lögreglumannsins. Maðurinn var handjárnaður og fluttur í lögreglubíl, en þar sparkaði maðurinn í átt að lögreglumönnum og hótaði þeim ítrekað lífláti. Þegar hann hafði verið fluttur á lögreglustöð réðist maðurinn með ofbeldi og hótunum um ofbeldi að lögreglumanni, sem var að gegna skyldustörfum, en maðurinn réðist að lögreglumanni og hótaði honum lífláti.
Maðurinn játaði að hafa ráðist á fyrrverandi sambýliskonu sína og eyðilagt síma hennar en kvaðst muna atburði eftir það óljóst.
Samkvæmt sakavottorði á maðurinn nokkuð langan brotaferil að baki. Þann 18. október 1990 var hann dæmdur í fjörutíu og fimm daga fangelsi, skilorðsbundið til tveggja ára, fyrir auðgunarbrot og brot gegn umferðarlögum.
Í janúar 1992 var maðurinn dæmdur í fjögurra mánaða fangelsi, skilorðsbundið til tveggja ára, fyrir auðgunarbrot og umferðarlagabrot.
Í maí 1998 var maðurinn dæmdur í fjögurra mánaða fangelsi, skilorðsbundið til tveggja ára, enn fyrir auðgunarbrot.
Í mars 2004 var maðurinn dæmdur í fimm mánaða fangelsi, skilorðsbundið til þriggja ára, fyrir auðgunarbrot og umferðarlagabrot.
Í desember 2007 var maðurinn dæmdur til greiðslu 225.000 króna sektar og sviptur ökurétti í þrjú ár og sex mánuði fyrir akstur undir áhrifum.
Í maí síðastliðnum var maðurinn dæmdur til greiðslu 100.000 króna sektar fyrir brot gegn nálgunarbanni sem sett var á hann vegna ítrekaðs ónæðis gagnvart fyrrverandi sambýliskonu sinni og fjölskyldu hennar.
Í dómi héraðsdóms segir að brot mannsins hafi beinst gegn fyrrverandi sambýliskonu og barnsmóður á heimili hennar þar sem þrjú ung börn þeirra voru. Þá liggi fyrir að nálgunarbann var sett á ákærða vegna ítrekaðs ónæðis gagnvart konunni og fjölskyldu hennar. Verði allt þetta virt manninum til refsiþyngingar. Dómurinn taldi fjögurra fangelsi hæfilega refsingu en ekki þóttu skilyrði til að skilorðsbinda refsinguna.
Konan krafðist rúmlega 400 þúsund króna í skaðabætur en dómurinn dæmdi henni 300 þúsund króna bætur.
