Héraðsdómur Suðurlands sýknaði í morgun konu af því að hafa framvísað fölsuðum lyfseðli en sakfelldi hana fyrir að hafa ekið undir áhrifum lyfja, óhæf til að stjórna ökutæki.

Konan sem er á fertugsaldri var ákærð fyrir skjalafals með því að hafa í apríl 2008 framvísað í versluninni Lyf og Heilsa í Kringlunni fölsuðum lyfseðli í því skyni að fá afhent Imovane svefntöflur. Þá var konan ákærð fyrir umferðarlagabrot, með því að hafa í mars 2008, ekið bifreið undir áhrifum deyfandi lyfja. konan ók frá Reykjavík uns lögregla hafði afskipti af henni vestan við Markarfljót í Rangárvallasýslu þar sem konan var í vandræðum með bifreið sína.

Konan játaði fyrir dómi að hafa framvísað lyfseðlinum en kvaðst ekki hafa vitað að hann væri falsaður. Ennfremur játaði konan að hafa ekið bifreiðinni í umrætt sinn en kvaðst telja að hún hafi ekki verið undir áhrifum lyfja.

Gegn neitun konunnar taldi héraðsdómur að ákæruvaldinu hefði ekki tekist að sanna, svo hafið sé yfir skynsamlegan vafa, að konan hefði gerst sek um skjalafals vegna lyfseðilsins og var hún því sýknuð af þeim hluta ákærunnar.

Hins vegar var hún sakfelld fyrir akstur undir áhrifum lyfja. Konan var dæmd til að greiða 70 þúsund krónur í sekt og svipt ökuréttindum í þrjá mánuði.

Dómur héraðsdóms