Rúmlega 100 fyrrverandi starfsmenn Spron bíða enn eftir launagreiðslum úr þrotabúi bankans. mbl.is/Árni Sæberg

„Það þarf að mínu mati ekki lagabreytingu til að slitastjórn Spron sé heimilt að greiða fyrrverandi starfsmönnum laun í uppsagnarfresti. Ég sé ekki betur en að slitastjórnin hafi fullar heimildir til að greiða launin og sé það skylt, svo fremi að eignir séu til fyrir greiðslu launa og annarra forgangskrafna í þrotabúi Spron,“ segir Álfheiður Ingadóttir, formaður Viðskiptanefndar Alþingis.

Fyrrverandi starfsmönnum SPRON var um mánaðamótin tilkynnt að þeir fengju ekki lengur greidd laun í uppsagnarfresti. Rúmlega 100 starfsmenn fengu því engin laun 1. júlí. Ákvörðun um að stöðva launagreiðslur var tekin af slitastjórn Spron 30. júní en stjórnin taldi sig ekki hafa heimild til að greiða laun í uppsagnarfresti úr þrotabúi Spron. 

„Spron fellur undir það regluverk sem sett var og gildir almennt. Það er rangt að lagabreyting sem Alþingi samþykkti í apríl hafi tekið til Spron. Lögin tóku til fyrirtækja sem voru þegar komin í greiðslustöðvun og í fangið á ríkinu, m.a. Straums og Sparisjóðabankans. Spron fer í þrot eftir að lögin hafa tekið gildi og þá gildir almenna regluverkið, sem byggir á lögum um gjaldþrotaskipti,“ segir formaður viðskiptanefndar Alþingis.

Hún telur því að slitastjórn Spron sé heimilt og beinlínis skylt að greiða fyrrverandi starfsmönnum laun í uppsagnarfresti, þó með þeim fyrirvörum sem settir eru við greiðslu launa í uppsagnarfresti.

Fulltrúar starfsmanna þinguðu í morgun með slitastjórn þar sem m.a. kom fram að slitastjórnin hafi átt fund með viðskiptaráðherra fyrir helgi. Þar var m.a. rædd sú skoðun slitastjórnar að lagabreytingu þurfi til að greiða starfsmönnunum laun.

Formaður viðskiptanefndar vonar að farsæl lausn í málinu, án þess að setja þurfi bráðabirgðaákvæði við ný lög sem gilda eiga til frambúðar.