Retuers

„Ég á ekki von á því að nefndin afgreiði málið út fyrr en eftir helgi,“ segir Guðbjartur Hannesson, formaður fjárlaganefndar Alþingis. Nefndin hefur í gær og dag þingað um frumvarp um ríkisábyrgð vegna Icesave-samninga við Breta og Hollendinga.

Fjárlaganefnd þingaði fram á kvöld í gær um Icesave-ábyrgðir og fékk m.a. á sinn fund samninganefndina sem gekk frá samkomulagi við Breta og Hollendinga, fulltrúa tryggingarsjóðs innstæðueigenda og fjárfesta og fulltrúa úr skilanefnd og slitastjórn Landsbankans.

Í dag koma á fund fjárlaganefndar þeir sem gagnrýnt hafa Icesave-samningana, m.a. fulltrúar InDefence-hópsins. Þá hafa aðilar á vinnumarkaði verið boðaðir á fund nefndarinnar.

Reiknað er með að fjárlaganefnd þingi fram á kvöld og fyrir hádegi á morgun en þingfundir eru áformaðir eftir hádegi á morgun.

Fjárlaganefnd hefur óskað eftir umsögnum utanríkismálanefndar og efnahags- og skattanefndar um frumvarpið um ríkisábyrgð vegna Icesave-samninganna og ljóst að mikil vinna bíður við úrvinnslu upplýsinga sem fram hafa komið.

Formaður fjárlaganefndar segir að reynt verði að afgreiða málið eins hratt og kostur er út úr nefndinni en það verði ekki gert á kostnað vandaðrar málsmeðferðar.

Guðbjartur Hannesson, formaður fjárlaganefndar Alþingis