Uppbygging á horni Austurstrætis og Lækjargötu og við Laugaveg 4 og 6 hefst í haust. Framkvæmdir verða unnar í tengslum við svonefnt Halland-verkefni sem hleypt verður af stokkunum í september nk.

Halland-verkefnið gengur í stuttu máli út á uppbyggingu og endurgerð gamalla húsa. Með því skapast störf auk þess sem hægt verður að auka á menntun og reynslu fagstétta á borð við arkitekta, verkfræðinga og iðnaðarmenn. Í grunninn felst í verkefninu að kenna atvinnulausum einstaklingum innan fagstéttanna handbragðið og í kjölfarið ráðast í endurgerðina.

Reykjavíkurborg í samstarfi við Vinnumálastofnun og Iðunni fræðslusetur standa að verkefninu. Vinnumálastofnun greiðir þeim sem taka þátt atvinnuleysisbætur úr Atvinnuleysistryggingasjóði og Reykjavíkurborg greiðir mismun milli bótanna og taxtakaups auk þess að greiða efniskostnað. Námskeið Iðunnar í endurgerð gamalla húsa verða líklega notuð sem grunnur að nýjum námskeiðum.

Önnur sveitarfélög áhugasöm

Fyrirkomulagið verður þannig að stýrihópur fer með daglegan rekstur en sérstök stjórn ákveður fjármagn og tekur ákvörðun um hvaða byggingar verður ráðist í endurgerð eða uppbyggingu á.

Óskar Bergsson, formaður borgarráðs, segir að þegar hafi verið eyrnamerkt fjármagn til uppbyggingar á horni Austurstrætis og Lækjargötu og einnig á Laugavegi 4 og 6. Þau verkefni falli því vel inn í Halland-verkefnið – þó svo að ekki sé ljóst hversu mikill hluti þeirra framkvæmda verður bundinn verkefninu.

Að auki er gert ráð fyrir óbundnum 300 milljónum króna í fjárhagsáætlun borgarinnar árið 2009 sem hugsuð voru fyrir mannaflsfrek verkefni. Hluti af þeirri fjárhæð verður notaður í verkefnið. Enn er óvíst hversu mörg störf skapast í kjölfar þess að farið verður af stað en það ræðst af fjölda verkefna og fjármagni.

Óskar segist finna fyrir miklum spenningi vegna verkefnisins, fjölmargir hafi haft samband og bent á fýsileg hús auk þess sem sveitarfélög á höfuðborgarsvæðinu og utan þess hafi spurst fyrir og horfi til svipaðra verkefna hjá sér. Hann telur að eftirspurn hjá atvinnulausum iðnaðarmönnum verði mikil. „Þetta er flott verkefni og tímabært í atvinnuleysi.“

Vakti athygli einkaaðila

Í Svíþjóð stækkaði verkefnið jafnt og þétt og á tólf ára tímabili höfðu 1.100 manns hlotið menntun og þekkingu á gömlu handverki og endurgerð húsa. Á sama tímabili voru 85 hús tekin í gegn, þar af voru 25 hús sem ella hefðu verið rifin.

Christer Gustafsson, stofnandi og stjórnarmeðlimur Halland-verkefnisins, kynnti nemum í norrænni byggingarlist verkefnið en á meðal þeirra var Íslendingur. Sá benti borginni á verkefnið.

Í kjölfarið kom Gustafsson hingað til lands og kynnti verkefnið á námstefnu sem haldin var á Hótel Sögu. Hann mun verða stjórn verkefnisins hér á landi til halds og trausts.

Í Svíþjóð fór svo að verkefnið vakti athygli einkaaðila sem tóku virkari þátt eftir því sem á leið. Óskar segist vel geta hugsað sér verkefnið sem samstarfsverkefni ríkis, borgar og einkaaðila um endurgerð húsa í einkaeigu.