Hákon EA fékk um 140 tonn af síld og makríl í nótt. Um 19% voru makríll.

Hákon EA fékk í nótt um 140 tonn af norsk-íslenskri síld og makríl í Seyðisfjarðardýpinu um 40-50 mílur frá landi. Aflinn fékkst eftir  fjögurra tíma tog. Um 19% aflans var makríll og síldin þokkalega væn, um 350 g síld. Aflinn er frystur um borð til manneldis.

Skipið er við tilraunaveiðar á síld á svæðinu sunnan við 66°N og má veiða til kl. 8.00 í fyrramálið.  Arnþór Pétursson stýrimaður á Hákoni EA sagði í samtali við mbl.is í morgun að mikið líf sé á miðunum en síldin mikið dreifð. Ekki séu margir staðir þar sem hún er í veiðanlegu magni. Eins virðist víða vera hægt að finna makríl.

Norsk-íslenska síldin er heilbrigð og ekki sýkt eins og sum sú íslenska. Arnþór sagði að makríllinn væri ágætis fiskur en ekki jafn stór og sá stærsti sem fékkst í fyrra. Hann fór að verða enn vænni upp úr miðjum júlí í fyrra.

Bæði síldin og makríllinn eru fryst um borð í Hákoni EA. Arnþór taldi að um tvöfalt meira fáist fyrir frystan makríl til útflutnings en fæst fyrir mjöl og lýsi úr makrílnum. „Þetta er dýrasti uppsjávarfiskurinn sem unninn er úr sjó til manneldis. Það er því synd að vera að landa meirihlutanum af honum í bræðslu. Það veitti ekki af fyrir gjaldeyrisöflunina að gera meiri verðmæti úr þessu,“ sagði Arnþór.

Þeim á Hákoni EA duga um 100 tonn á dag úr sjó til að dekka sólarhringsvinnslu, að sögn Arnþórs.

Breyting á reglugerð um stjórn veiða íslenskra skipa úr norsk-íslenska síldarstofninum tók gildi á miðnætti í fyrrinótt. Veiðar úr þeim stofni eru nú einungis heimilar fyrir norðan 66°N og þar má makrílafli ekki fara yfir 10% af heildarafla á hverju þriggja vikna tímabili.

Arnór sagði að þeim þætti línan dregin nokkuð norðarlega ef menn ætli að vera við síldveiðar á nærmiðum fram eftir ágúst mánuði eins og gert hefur verið tvö undanfarin ár. Hann sagði muna miklu í stími að veiða síldina nærri landinu í stað þess að þurfa að leita að henni norður í höf.