Lögreglubílinn var mikið skemmdur eftir hafa reynt að stöðva för stolins Land Cruiser jeppa. Eftirförinni lauk í Holtaseli. Jakob Fannar Sigurðsson

Haugdrullugur bílþjófur var handtekinn í garði í Hryggjarseli í morgun. Honum hafði þá verið veitt eftirför um Breiðholtið í nokkra stund. Maðurinn sinnti engum umferðarreglum, ók á ofsahraða og yfir á rauðu ljósi. Lögreglubíll skemmdist nokkuð þegar honum var ekið á stolna bílinn til að stöðva hann. 

Að sögn varðstjóra hjá lögreglu höfuðborgarsvæðisins var tilkynnt um mann sem væri að snuðra í kringum bíla í Fremristekk í Neðra-Breiðholti. Skömmu síðar, um kl. 5.20, hringdi maður sem kvaðst sjá á eftir nýlegum Toyota jeppa sínum út götuna. 

Lögreglan fór á eftir jeppanum sem ók greitt upp Breiðholtsbrautina. Þrír lögreglubílar tóku þátt í eftirförinni. Við gatnamótin við Jaðarsel var lögreglubíl ekið á jeppann til að freista þess að stöðva stolna bílinn og skemmdist lögreglubíllinn nokkuð við það. Framstuðarinn og grillið sátu eftir á götunni.

Eltingaleikurinn barst inn í Seljahverfið og ók bílþjófurinn inn í Holtasel þar til hann lenti í sjálfheldu innst í blokkarbotnlanga. Þar stökk þjófurinn út úr stolna bílnum og lagði á flótta. Fleiri lögreglumenn voru kallaðir á staðinn og sló lögreglan hring utan um hverfið og hóf leit að manninum.

Bílþjófurinn fannst svo í húsagarði við Hryggjarsel eftir nokkra leit og var handtekinn. Hann var í annarlegu ástandi og orðinn haugdrullugur eftir að skríða um garðana í Seljahverfi. Maðurinn var færður á lögreglustöðina. Hann er fæddur 1988 og hefur áður komið við sögu hjá lögreglunni.