Þingmönnum stjórnarandstöðunnar lá mikið á hjarta við umræðu um breytingar á lögum um fjármálafyrirtæki á Alþingi í gær. Kvöddu 11 af 16 þingmönnum Sjálfstæðisflokks sér hljóðs og komu flestir þeirra oft í pontu og töluðu hægt. Var rætt um málið í fimm og hálfan klukkutíma, þrátt fyrir að um þriðju umræðu væri að ræða. Um kl. 18.20 tók við þriðja umræða um opinbert hlutafélag til að stuðla að endurskipulagningu rekstrarhæfra atvinnufyrirtækja og stóð yfir langt fram eftir kvöldi.

„Þetta var löng og ítarleg umræða,“ segir Álfheiður Ingadóttir, formaður þingflokks VG: „Það helgast af miklum ágreiningi um málið. Þá er ekkert óeðlilegt að umræðan sé löng, jafnvel við þriðju umræðu.“

Ásta Ragnheiður Jóhannesdóttir, forseti Alþingis, tekur undir að umræðan hafi verið löng. „Ég hélt að þessi mál væru nokkuð útrædd en það hefur greinilega verið þörf á meiri umræðu.“

Innt eftir því hvort hægt verði að ljúka þingi í næstu viku segir hún: „Við hljótum að stefna að því að ljúka þessu sem fyrst, enda er þetta orðið lengsta sumarþing frá upphafi.“

Illugi Gunnarsson, formaður þingflokks sjálfstæðismanna, vísar á bug að flokkurinn hafi haldið uppi málþófi á þingi í gær. Um stór mál sé að ræða sem hafi fengið mikla umræðu í meðförum þingsins á öllum stigum. „Þarna er um að ræða gríðarlega mikilvægar stofnanir í samfélaginu þannig að það er mjög eðlilegt að einstakir þingmenn vilji koma sínum sjónarmiðum á framfæri.“