Jón Gunnar ásamt ferðafélaganum Ingólfi Stefánssyni og Helgu Viðarsdóttur markaðstjóra hjá 66°N sem styrkir ferðina. mbl.is/Ómar

„Ferð mín um hálendið hefur gengið vel. Það helsta sem hefur verið að plaga okkur er of gott veður, sólskin og uppundir 25 stiga hiti. “ Þetta segir Jón Gunnar Benjamínsson í bréfi frá leiðangri sínum, Þvert yfir landið 2009, sem er nú hálfnaður. Jón Gunnar, sem lamaðist fyrir neðan mitti í slysi árið 2007, hóf ferð sína á miðvikudaginn. Hann ekur á sérútbúnu fjórhjóli yfir hálendi Íslands, frá Mývatni til Reykjavíkur. Leiðin er alls um 700 km og lýkur á sunnudag.

Markmið ferðarinnar, sem styrkt er af ýmsum fyrirtækjum, er m.a. að sýna að fatlaðir geti leyst erfið verkefni og notið þess að ferðast um hálendið, kanna aðgengi fyrir fatlaða í skálum á hálendinu og að koma af stað áheitasöfnun til að kosta bætt aðgengi fatlaðra að Landmannalaugum.

Í bréfinu, sem Jón Gunnar ritar í Drekagili við Öskju segir meðal annars:

„Við beygðum út af þjóðvegi 1 við Grænavatn í Mývatnssveit og við tók moldarslóði upp Suðurárbotna sem var tiltölulega auðveldur yfirferðar, en það var líka það eina sem var auðvelt við leið dagsins! Við tók hið illfæra Ódáðahraun sem átti eftir að krefjast allrar okkar orku….amk. undirritaðs! Með nokkrum góðum stoppum þar sem dáðst var að útsýninu og gónt með áhyggjusvip á stöðuna á bensínmælinum komumst við í gegn áfallalaust. Veðrið var alveg ótrúlegt! 25°C og nánast logn og bara algjör steik!
 Sandarnir við Dyngjuvatn tóku við eftir hraunið og þá var kominn tími til að gefa í!“

Jón Gunnar segir það hafa verið ánægjulegt að renna í hlað í Drekagili við Öskju og komast af hjólinu eftir tæplega 9 tíma setu. Frábært aðgengi hafi verið að skála Ferðafélags Akureyrar í Drekagili, þar sem gist var í tvær nætur

„[Þar er] aðeins einn þröskuldur sem tilvalið væri að setja við litla skábraut svo staðurinn væri fullkominn.
 Húrra Ferðafélag Akureyrar!“

Í dag munu Jón Gunnar og félagar aka við Flæðurnar að Vatnajökli og reyna að aka á jökulinn. Síðan fara þeir í skálann í Gæsavötnum norðvestur af Dyngjujökli. Á morgun aka þeir um Marteinsflæður, Nýjadal og áfram til Hrauneyja og Landmannalauga.