Dómsmálaráðuneytið hefur vísað frá kæru Hafskipsmanna sem kröfðust þess að ráðuneytið ógilti ákvörðun ríkissaksóknara um að ekki væri þörf á frekari rannsókn á Hafskipsmálinu en til vara að dómsmálaráðherra skipaði annan ríkissaksóknara í stað Valtýs Sigurðssonar til að gegna stöðu ríkissaksóknara í þessu máli.

Lögmaður Hafskipsmanna, Ragnar Aðalsteinsson, segir málinu ekki lokið og möguleiki sé á að skjóta ákvörðun ráðuneytisins til dómstóla.

Forsaga málsins er sú að 2. október 2008 fóru Hafskipsmenn þess á leit við ríkissaksóknara að hann hæfi opinbera rannsókn á meintum brotum dómara við skiptarétt Reykjavíkur, ríkislögmanns, ríkissaksóknara, rannsóknarlögreglustjóra ríkisins og starfsmanna þeirra við rannsókn Hafskipsmálsins. Ríkissaksóknari féllst á að taka rannsóknarbeiðnina til rannsóknar og tilkynnti jafnframt að hann myndi fela lögreglustjóra að annast rannsóknina eftir nánari fyrirmælum og skila ríkissaksóknara greinargerð að rannsókn lokinni.

Í lok janúar á þessu ári ritaði Valtýr Sigurðsson bréf til lögmanns Hafskipsmanna og tilkynnti honum að við nánari könnun málsins hefði komið í ljós að ekki væri þörf á að fela lögreglustjóra rannsóknina. Valtýr gagnrýndi rannsóknarbeiðnina og sagði m.a. að vegna þess hversu skorti á skýrleika hennar, væri mjög torvelt að greina rannsóknarefni sem beiðnin lýtur að. Mikið væri um fullyrðingar án þess að beinlínis væri verið að lýsa háttsemi sem varðaði við refsilög.