Mynd ls.is

„Fyrir smábátaeigendur eru þetta slæm tíðindi. Enn einn niðurskurðurinn ofan í gríðarlegar hækkanir á öllum aðföngum,“ segja talsmenn Landssambands smábátaeigenda um ákvörðun Jóns Bjarnasonar, sjávarútvegs- og landbúnaðarráðherra um leyfilegan heildarafla á næsta fiskveiðiári.

Samkvæmt kvótaákvörðun næsta fiskveiðiárs er um að ræða niðurskurð að ræða í öllum þeim tegundum sem smábátaflotinn byggir á að mestu, þ.e. þorski, ýsu, ufsa og steinbít.

Á dögunum kynnti stjórn Landssambands smábátaeigenda sjávarútvegsráðherra tillögur sínar um kvóta næsta fiskveiðiárs. LS hvatti ráðherra til að heimila 200 þúsund tonna þorskveiði. LS mælti hins vegar með minni ýsuafla eða sem nemur 14% skerðingu frá kvóta yfirstandandi fiskveiðiárs,.en óbreyttum veiðiheimildum í steinbít, ufsa, löngu og keilu. Auk þess mælti LS með að aflatakmarkanir á skötusel yrðu afnumdar.

Niðurstaðan varð sú að leyfilegur þorskafli á næsta fiskveiði ári veðrur 150 þúsund tonn, skerðist um 7,69%, ýsuaflinn skerðist um 32,26%, verður63 þúsund tonn, ufsakvótinn er skertur um 23,08% og verður 50 þúsund tonn og steinbítskvótinn verður 12 þúsund tonn, skerðist um 7,69%.

Í fréttatilkynningu sjávarútvegsráðuneytisins er tekið fram að inn í heildarafla þorsks er ekki gert ráð fyrir strandveiðum. Skýringin er sú að strandveiðarnar eru bráðabirgðaákvæði í lögum á yfirstandandi fiskveiðiári. Þá segir að ráðherra hafi í hyggju að skoða aðrar leiðir varðandi veiðar á skötusel á næsta fiskveiðiári.

„Á undanförnum árum hefur LS skorað á yfirvöld sjávarútvegsmála að fara mun hærra með heildarafla í þorski. Á síðustu vetrarvertíð voru margir þeirrar skoðunar, sem hafa verið við sjósókn svo áratugum skiptir, að annað eins af fiski hafi þeir ekki séð,“ segir á heimasíðu LS.

Heimasíða LS