Lögreglan á Hvolsvelli er ánægð með hversu áfallalaust helgin hefur gengið fyrir sig. Júlíus Sigurjónsson

Menn í villum á Sólheimajökli, drukkinn ökumaður húsbíls og erlendur bílstjóri í hraðakstri á Toyotu Yaris voru meðal verkefna lögreglunnar á Hvolsvelli í gærkvöldi og í nótt. Engin slys urðu þó á fólki og segir lögregla helgina hafa í raun gengið ótrúlega vel fyrir sig, miðað við þann fjölda ferðamanna sem nú eru í umdæminu.

Lögreglan á Hvolsvelli fékk skömmu eftir miðnætti í nótt tilkynningu um þrjá íslenska menn sem höfðu villst á Sólheimajökli. Var björgunarsveitin í Vík fengin til aðstoðar og gekk greiðlega að koma mönnunum niður af jöklinum en því var lokið um fjögurleytið í nótt.

Þá veitti lögregla athygli undarlegu aksturslagi húsbíls sem rásaði á veginum við Hellu í gærkvöld. Reyndist ökumaður verið talsvert ölvaður þegar að var gáð.

Eins voru fimm teknir fyrir of hraðan akstur í umdæminu í gær og í nótt. Rétt fyrir átta í gærkvöldi var erlendur ökumaður á Toyotu Yaris stöðvaður milli Víkur og Klausturs en hann reyndist vera á 156 kílómetra hraða. Var hann sektaður og sviptur ökuréttindum á Íslandi á staðnum.

Lögregla fór einnig yfir í Þórsmörk þar sem um þúsund manns voru í Básum að sögn skálavarða. Þrátt fyrir nokkra ölvun fór skemmtanahaldið vel fram og voru engar kvartanir yfir látum.

Að sögn lögreglu er mjög mikil umferð í umdæminu þessa helgi en áberandi er hversu róleg og hæg hún er, fyrir utan stöku ökumenn sem geta ekki haft hemil á bensínfætinum. Engin slys hafa orðið á fólki í dag eða í gær né hefur verið tilkynnt um umferðaróhöpp.

Þá var einnig nokkur erill hjá lögreglunni á Selfossi í nótt og í morgun, en fimm voru teknir grunaðir um ölvun við akstur. Fjölmenni er á tjaldsvæðum í sýslunni og hefur lögregla haft nokkur afskipti af drukknum tjaldbúum sem hafa ónáðað aðra. Flestir létu sér segjast en einn gisti fangageymslur í nótt vegna ölvunar og óláta. Fékk hann að fara í morgun að loknu viðtali við varðstjóra.