Verkalýðsfélag Akraness skrifaði nú áðan undir samning um framlengingu og breytingar á kjarasamningi félagsins við Launanefnd sveitarfélaga. Eins og fram hefur komið þá stóð jafnvel til að félagið myndi ekki skrifa undir samninginn en flest önnur verkalýðsfélög hafa undirritað samninginn.

Á vef verkalýðsfélagsins kemur fram að ástæðan fyrir því að formaður félagsins, Vilhjálmur Birgisson, íhugaði að skrifa ekki undir var vegna þeirrar ákvörðunar bæjarráðs Akraneskaupstaðar að breyta vinnutilhögun skólaliða og starfsmanna íþróttamannvirkja. Þessar breytingar hafa þau áhrif að launakjör áðurnefndra aðila eru að lækka frá 10% upp í tæp 15%.

„Verkalýðsfélag Akraness tók þá ákvörðun að skrifa undir þennan samning á þeirri forsendu að allflest stéttarfélög hafa þegar gengið frá framlengingu á kjarasamningi. Mun Verkalýðsfélag Akraness hins vegar reyna eftir fremsta megni að fá þeim niðurskurði sem boðaður hefur verið á launakjörum starfsmanna Akraneskaupstaðar sem tilheyra VLFA breytt með einum eða öðrum hætti.

Sem dæmi þá hefur Verkalýðsfélag Akraness skrifað bæjarráði og bæjarstjórn bréf þar sem óskað er eftir því að skipaður verði vinnuhópur sem muni fara yfir þær sparnaðaraðgerðir sem boðaðar hafa verið. Þegar þetta er skrifað hefur ekkert svar borist frá bæjaryfirvöldum," að því er segir á vef Verkalýðsfélags Akraness.

Sjá nánar um kröfur VLFA og kjarasamninginn