Reuters

silja@mbl.is

Jafnvel þótt bæði norsk og bresk stjórnvöld hyggist bólusetja alla íbúa beggja landa við svínaflensu, munu þau þurfa að forgangsraða bóluefninu með sama hætti og íslensk stjórnvöld. Þetta segir Haraldur Briem sóttvarnalæknir og bendir á að bóluefnið muni berast þjóðunum í smáum skömmtun frá hausti og fram að áramótum.

„Á þeim tímapunkti höfum við hins vegar möguleika á að kaupa meira bóluefni ef aðstæður gefa tilefni til,“ segir Haraldur. Að hans sögn felst gríðarlegur kostnaður í því að kaupa bóluefni fyrir alla þjóðina sem verði svo hugsanlega aldrei þörf fyrir.

„Menn verða því að stefna þessu inn í einhvern skynsemisfarveg. Við metum stöðuna sem svo að þegar bóluefnið loks verður tilbúið með haustinu, muni útbreiðsla svínaflensunnar hafa verið með þeim hætti að stór hópur landsmanna verði þegar búinn að fá veikina,“ segir Haraldur og bætir við: „Ég tel að við séum nokkuð vel varin með því að bólusetja helming þjóðarinnar og umfram allt þá sem eru í áhættuhópi, s.s. fólk með undirliggjandi sjúkdóma á borð við hjarta- og lungnasjúkdóma.“

Haraldur minnir á að í landinu séu inflúensulyf fyrir tæplega 40% landsmanna, en lyfin eru notuð til að lækna þá sem sýkst hafa af veirunni. „Reynslan sýnir að árlega sýkjast um 10% landsmanna í hverjum inflúensufaraldri, en í heimsfaraldri gerum við ráð fyrir að 50% landsmanna sýkist,“ segir Haraldur, en tekur fram að enn sé þó of snemmt að spá fyrir um hvernig svínaflensan muni hegða sér. Spurður hvernig forgangsraðað verði, þ.e. hverjum bóluefnið muni standa til boða hérlendis, segist Haraldur búast við því að sóttvarnastofnun ESB komi með ákveðnar ráðleggingar. Segir hann erfitt að meta þetta fyrirfram og bregðast þurfi við þegar ljóst verði hvaða hópar verði fyrir mestu sjúkdómsbyrðinni.