Sverrir Vilhelmsson

Velta í dagvöruverslun dróst saman um 4,7% á föstu verðlagi, en þá er miðað við þá krónutölu sem er í gangi hvert sinn sem mælt er óháð öllum öðrum áhrifum,  í júní miðað við sama mánuð í fyrra en jókst um 15% á breytilegu verðlagi, en þá á sér stað leiðrétting á verðlaginu með því að taka tillit til verðbreytinga sem hafa orðið á tímabilinu. Leiðrétt fyrir árstíðarbundnum þáttum nam samdráttur í veltu dagvöruverslana 5,4% frá sama mánuði í fyrra. Verð á dagvöru í júní hækkaði um 1,2% frá mánuðinum á undan. Á síðustu tólf mánuðum hækkaði verð á dagvöru um 20,7%.

Verðhækkun áfengis 38,2% á tólf mánuðum

Sala áfengis minnkaði um 13% í júní miðað við sama mánuð árið áður á föstu verðlagi en jókst um 20,2% á breytilegu verðlagi. Verð á áfengi hækkaði um 38,2% í júní síðastliðnum miðað við sama mánuð í fyrra og um 9,4% frá mánuðinum á undan samkvæmt verðmælingu Hagstofunnar. Miklar verðhækkanir á áfengi að undanförnu virðast því hafa dregið úr magni þess áfengis sem selt er, að því er segir í samantekt Rannsóknarseturs verslunarinnar.
 
Mun minni sala á fatnaði og skóm

Fataverslun var 24,9% minni í júní á föstu verðlagi miðað við sama mánuð í fyrra og 7,7% minni á breytilegu verðlagi á sama tímabili. Verð á fötum hækkaði um 22,9% á einu ári en lækkaði um 0,2% frá mánuðinum á undan.
 
Álíka samdráttur var í skóverslun. Þannig minnkaði velta skóverslana um 23,7% í júní á föstu verðlagi og um 10,1% á breytilegu verðlagi miðað við sama mánuð í fyrra. Verð á skóm hækkaði um 17,8% á síðastliðnum 12 mánuðum.
 
Velta í húsgagnaverslunum dróst saman um 45,6%

Í júní minnkaði velta í húsgagnaverslun um 45,6% á föstu verðlagi miðað við júní í fyrra og um 31,2% á breytilegu verðlagi. Í júní hafði verð á húsgögnum hækkað um 26,5% á síðasta 12 mánuðum tímabili en lækkaði um 1% frá mánuðinum á undan.
 
Sala á raftækjum í júní dróst saman um 32,4% á föstu verðlagi frá sama mánuði í fyrra og um 6% á breytilegu verðlagi.

Ekki selt jafn lítið af áfengi í júní í fimm ár

„Verslun heldur áfram að dragast saman. Enn er það húsgagnaverslun og raftækjaverslun sem mestur samdráttur er í að raunvirði milli ára. En einnig vekur athygli mikill samdráttur í sölu áfengis. Áfengissala að magni til var minni í júní síðastliðnum heldur en í hverjum júnímánuði undanfarin fjögur ár. Fara þarf aftur til júní árið 2004 til að finna minni sölu að magni til í þessum mánuði. Miklar verðhækkanir á áfengi virðast hafa haft umtalsverð áhrif.
 
Meðalkaupmáttur fyrstu fimm mánaða þessa árs var 8,1% minni en á sama tímabili á síðasta ári og því ljóst að neytendur halda að sér höndum og verja ráðstöfunarfé sínu frekar til kaupa á nauðsynjum en því sem hægt er að fresta. Innlend greiðslukortavelta dróst saman um 21,9% að raunvirði í janúar til maí á þessu ári miðað við sama tímabil í fyrra samkvæmt upplýsingum Hagstofunnar," að því er segir í tilkynningu.