Jón Steindór Valdimarsson

Eftir Unu Sighvatsdóttur

„Ég held að þetta muni almennt auka tiltrú umheimsins á því að við munum rísa úr öskustónni,“ segir Jón Steindór Valdimarsson, framkvæmdastjóri Samtaka iðnaðarins. Samtökin fagna þeirri niðurstöðu Alþingis að sækja um aðild að Evrópusambandinu.

„Ég held að það sé ákaflega gott að það sé búið að leiða þennan þátt Evrópuumræðunnar til lykta, það er þá að minnsta kosti búið að ljúka þessum kafla og nú tekur við næsti kafli. Nú snúum við okkur að því, bæði við hér hjá Samtökum iðnaðarins og þjóðin öll að einhenda okkur í að ná sem bestum samningum og þegar sá samningur liggur fyrir þá getum við tekið endanlega afstöðu til þess hvort aðild að Evrópusambandinu er til hagsbóta fyrir Ísland og Íslendinga.“

Á meðan það samningaferli á sér stað segist Jón Steindór trúaður á að áhrif þessa fyrsta skrefs verði tvímælalaust góð fyrir þjóðina, þótt tíminn eigi eftir að leiða það endanlega í ljós.  „Við teljum að þetta sé mjög mikilvægt og langþráð skref og reyndar hefðum við talið að við hefðum átt að stíga þetta skref fyrir mörgum, mörgum árum. Og það er alveg óháð þeim vandræðum sem við erum í í dag, okkar skoðun í þessu máli tengist því ekki neitt því við höfum haft hana lengi.“

Jón Steindór segir gjaldmiðilinn einn veigamesta þáttinn í þeirri skoðun SI. „Við teljum að iðnaður og atvinnulíf til framtíðar þurfi miklu meiri stöðugleika heldur en við höfum getað boðið upp á með okkar kerfi, sem byggir á krónunni. Við erum búin að missa trúna á því að við getum lifað við það.“