mbl.is/Einar Falur

Tæplega 8% verðmunur er á raforkuverði til heimila, á þeim hluta sem er á frjálsum markaði, samkvæmt könnun Neytendasamtakanna. Frá því samtökin könnuðu síðast verð árið 2006 hefur söluhluti raforkuverðs hækkað um 8-26%.

Raforkusala var gefin frjáls til neytenda í ársbyrjun 2006. Þó er hluti raforkunnar ekki á frjálsum markaði því dreifing og flutningur er enn undir sérleyfisstarfsemi þar sem dreifiveita hvers svæðis sér um dreifingu raforku til notenda og kostnaður því breytilegur eftir landssvæðum.

Til að auðvelda neytendum að finna hagkvæmasta verð á rafmagni sjá Orkustofnun og Neytendastofa um reiknivél sem ber saman gjaldskrár orkufyrirtækjanna. Á vef Neytendasamtakanna segir að til hafi staðið að nýta reiknivélina við gerð þessarar könnunar en í ljós kom að hún gerir ekki enn ráð fyrir nýjustu verðhækkun orkufyrirtækjanna frá 1. júlí sl, en þá hækkaði gjaldskrá fyrir sölu um 3,7%-7,5%. Orkufyrirtækin hækkuðu einnig verð um síðustu áramót.  Hækkunin nú kemur í kjölfarið á 7,5% hækkun Landsvirkjunar í heildsölu. Neytendasamtökin geta þess að sum orkufyrirtækin framleiða sjálf stóran hluta af raforkusölu sinni.

Neytendasamtökin könnuðu síðast verð á rafmagni í mars 2006. Á þessu tímabili hefur dreifing og flutningur hækkað um 15-50%, en það er sá hluti raforkuverðs sem ekki er á frjálsum markaði. Þar hefur dregið sundur með fyrirtækjunum því nú er rúmlega 30% verðmunur milli hæsta og lægsta verðs. Á sama tímabili hefur söluhluti raforkuverðs hækkað um 8-26% og nú er munurinn aðeins 7,9%  milli hæsta og lægsta verðs, það er sá hluti sem er á frjálsum markaði.

Vefur Neytendasamtakanna