Frá kerskála Norðuráls við Grundartanga. mbl.is/Brynjar Gauti

„Það er ljóst að starfsmenn hafa eðlilega væntingar til töluverðra hækkana á sínum samningi,“ segir Vilhjálmur Birgisson, formaður Verkalýðsfélags Akraness um kjaraviðæður vegna starfsmanna hjá Norðuráli. Undirbúningur vegna kjarasamnings starfsmanna Norðuráls hefst að loknum sumarleyfum. Álverð hefur hækkað um 26% frá því í febrúar og segir Vilhjálmur ljóst að þróun álverðs muni hafa töluverð áhrif á gang viðræðnanna.

Vilhjálmur Birgisson segir að nú séu allflestir kjarasamningar Verkalýðsfélags Akraness frágengnir, þ.e.a.s. framlenging á kjarasamningum við Samtök atvinnulífsins, Launanefnd sveitarfélaga og við Ríkið. Nú sé einungis einn kjarasamningur eftir á þessu ári en það er kjarasamningur Norðuráls. Sá samningur rennur út í lok þessa árs.

Formaður VLFA segir að þegar gengið var frá samkomulagi við forsvarsmenn Norðuráls í febrúar sl. þá hafi álverð verið í sögulegu lágmarki, þegar fengust undir 1300 dollarar fyrir tonnið. Staðan í dag sé mun betri. Í dag sé álverðið t.a.m. komið upp í 1635 dollara fyrir tonnið sem er hækkun upp á 26% frá því í febrúar.

„Vissulega eru blikur á lofti varðandi álverð til lengri tíma, sérstaklega vegna birgðasöfnunar á heimsvísu, en Norðurál stendur vel að vígi hvað varðar sölu á áli því þeir hafa tryggt sölu á öllum sínum afurðum í það minnsta til ársins 2016,“ segir Vilhjálmur.

Hann segir skipta gríðarlega miklu máli að álverð haldi áfram að hækka, enda muni það gefa Verkalýðsfélagi Akraness byr undir báða vængi þegar að kemur að kjarasamningagerð fyrir starfsmenn Norðuráls.

„Það er skylda þeirra fyrirtækja sem eru hér á álmarkaðnum að greiða sínum starfsmönnum góð laun enda er hér um að ræða fyrirtæki sem eru að selja sínar afurðir í erlendri mynt og því til viðbótar hafa þessi fyrirtæki aðgengi að hagstæðum orkusamningum og síðast en ekki síst kost á afar hæfu og tryggu starfsfólki,“ segir formaður VLFA.

Vefsíða VLFA

Vilhjálmur Birgisson, formaður VLFA.