Tilboði stofnanda og nokkurra lykilstarfsmanna Loftorku í þrotabú fyrirtækisins hefur verið tekið og mun fyrirtækið hefja rekstur á nýjan leik eftir helgi. „Við gerðum tilboð í um 20-30% af þrotabúinu, sem nær til rekstursins og tækja en allar fasteignir verða eftir í þrotabúinu,“ segir Konráð Andrésson, sem stofnaði Loftorku árið 1962.

Alls hljóðar tilboðið upp á tæpan milljarð, en þrotabúið í heild sinni er metið á fjórða milljarð króna. Að sögn Konráðs nema eignir þrotabúsins um þremur milljörðum, en tilboðið tók ekki til þeirra. „Við höfum gert þriggja ára leigusamning við aðalkröfuhafa þrotabúsins, sem er Glitnir, og munum því starfa áfram í sama húsnæði,“ segir Konráð.

Að mati Konráðs má gera ráð fyrir að um fjörutíu manns geti fengið vinnu hjá nýja fyrirtækinu, en þegar mest var í fyrra störfuðu hátt í þrjú hundruð manns hjá Loftorku, en eftir hrun var starfsmannafjöldinn kominn niður í sjötíu manns. Segist Konráð binda vonir við að hægt verði að fjölga starfsfólki aftur í framtíðinni. „Við förum hægt af stað, en vonum auðvitað að þetta stækki smám saman.“