„Það er full ástæða til að hvetja fólk til að skilja ekki eftir verðmæti þar sem þau sjást í bílunum. Við höfum fengið töluvert af tilkynningum um innbrot í bíla á almenningsstæðum. Síðast á laugardag var farið inn í fimm bíla á stæðinu við Mógilsá við Esjurætur, hliðarrúður brotnar og verðmæti hreinsuð burt,“ segir Árni Þór Sigmundsson, stöðvarstjóri  lögreglu höfuðborgarsvæðisins í Mosfellsbæ.

Árni segir að aldrei verði of oft brýnt fyrir ökumönnum að skilja ekki eftir verðmæti þar sem þau sjást inn um bílrúður. Þeir sem það geri bjóði heim hættunni. Óprúttnir séu aðeins augnablik að brjóta hliðarrúður og hreinsa það sem verðmætt er.

„Þetta er andvaraleysi, fólk á ekki von á því að svona gerist í alfaraleið en raunin er önnur. Þetta er í raun árvisst. Þjófarnir leita fanga á bílastæðum við Esjurætur, skóla, Í Heiðmörk, við ylströndina í Nauthólsvík, kvikmyndahús borgarinnar og víðar,“ segir Árni Þór Sigmundsson, stöðvarstjóri hjá lögreglunni.

Eignatjón af völdum innbrots getur verið tilfinnanlegt og brýnir lögreglan fyrir fólki að láta verðmæti ekki liggja laus í sæti eða annars staðar í bílnum þar sem þjófar sjá til.