Bústaðurinn er horfinn af lóðinni og standa undirstöðurnar einar eftir. Skessuhorn.is

Sumarbústaður sem stóð á lóð í Hvammslandi í Skorradal var í júní fluttur burt án nauðsynlegra leyfa. Bústaðurinn stendur nú í Lundarreykjadal. Upp komst um flutninginn þegar bjóða átti bústaðinn upp en á lóðinni hvíla verulegar skuldir.

Fréttavefurinn Skessuhorn greinir frá því að bústaðurinn hafi verið fluttur burt í byrjun júní. Var þetta 75 ermetra hús sem stóð á lóðinni Furuhvammi 1 í landi Hvamms. Strax og upp komst um flutninginn var haft samband við byggingafulltrúa sveitarfélagsins sem staðfestir að húsið hafi verið tekið af grunni sínum og flutt burtu í heimildarleysi. Kærði fulltrúinn málið til lögreglu sem nú hefur það til umfjöllunar.

Litrík saga

Saga bústaðarins er talsvert litrík. Á viðkomandi lóð hvíldu verulegar skuldir og svo virðist sem Gamli Landsbankinn hafi látið þinglýsa tryggingarbréfi á fyrsta veðrétti á lóðinni án þess að búið væri að staðfesta virði hússins hjá Fasteignamati ríkisins.  

Þegar Stefán Skarphéðinsson sýslumaður Mýra- og Borgarfjarðarsýslu hugðist bjóða upp lóð hússins 3. júní síðastliðinn vegna áhvílandi skulda, sem komnar voru í vanskil, kom í ljós að húsið sem á lóðinni hafði staðið var horfið. Stóðu undirstöðurnar einar eftir. Var því fremur rýr eftirtekja þeirra sem hugsanlega vildu bjóða í eignina.

Samkvæmt heimildum Skessuhorns hvíldu tæplega 20 milljónir króna á lóðinni og átti Landsbankinn fyrsta veðrétt eins og áður segir.  Samkvæmt heimildum Skessuhorns var aflað tilskilinna leyfa á sínum tíma hjá Skorradalshreppi til að byggja húsið á umræddri lóð og teikningar af því lágu fyrir hjá sveitarfélaginu. Hins vegar var samkvæmt fasteignaskrá ekki búið að verðmeta húseignina og gefa því fasteigna- eða brunabótamat. Samt kemur fram í fasteignaskrá að 75 fermetra hús standi á lóðinni. 

Umrætt hús stendur nú á jörð í Lundarreykjadal í Borgarbyggð. Til að mega setja niður hús til bráðabirgða þarf svokallað stöðuleyfi og staðfesti forstöðumaður framkvæmdasviðs Borgarbyggðar að ekki hafi verið sótt um slíkt leyfi. Eigendur jarðarinnar sem um ræðir í Lundarreykjadal kváðust hins vegar í samtali við Skessuhorn hafa verið í góðri trú þegar þeir veittu “eiganda” hússins leyfi til að geyma húsið á sínu landi.

Í þessu máli virðist sem farið hafi verið á svig við ýmiss lög og reglugerðir með flutningi hússins af lóðinni. Fyrir það fyrsta er með öllu bannað að flytja fasteignir af lóðum án leyfis viðkomandi skipulagsyfirvalda. Þá er ekki hægt að flytja hluta af þinglýstum eignum burtu af lóðum nema þær séu án veðbanda. Í öllum tilfellum þarf að sækja um leyfi til flutnings húsa af þeirri stærðargráðu sem hér um ræðir, en það mun ekki hafa verið gert hvorki hjá lögreglu né skipulagsyfirvöldum.

Þá segir hjá Skessuhorni að því megi velta því fyrir sér hvernig standi á því að banki taki hátt í 20 milljóna króna veð í tæplega hálfs hektara kargaþýfi, jafnvel þótt í Skorradal sé.