mbl.is/Brynjar Gauti

Lögreglan á höfuðborgarsvæðinu ákvað að óska ekki eftir áframhaldandi gæsluvarðhaldsvist yfir tveimur mönnum sem grunaðir eru um ítrekuð þjófnaðarbrot. Mennirnir voru handteknir í síðustu viku og hafa verið í gæsluvarðhaldi og einangrun síðan.

Lögreglumenn sem voru við eftirlit veittu öðrum mannanna athygli síðastliðinn þriðjudag og óku að bíl sem hann stóð við. Þá lét maðurinn sig hverfa inn í hús en lögregla veitti flatskjársjónvarpi í kassa athygli í bílnum. Í ljós kom að flatskjársjónvarpinu hafði verið stolið í innbroti á verkstæði Ormsson í Síðumúla sem tilkynnt hafði verið um fyrr um morguninn. Jafnframt kom í ljós að í kerru sem verið hafði við bifreiðina var talsvert af munum úr því innbroti og úr innbroti í vélasvið Heklu að Klettagörðum sem einnig hafði verið tilkynnt um fyrr um morguninn.

Á vettvangi fannst mikið magn af ætluðu þýfi úr fleiri innbrotum sem komið hafa til kasta lögreglu. Þá fannst mikið magn ætlaðs þýfis á vettvangi sem eftir sé að bera kennsl á, en miðað við magn ætlaðs þýfis á vettvangi tengist það fjölda innbrota.

Báðir eiga mennirnir sakaferil að baki og þar á meðal í auðgunarbrotum. Lögregla hefur til rannsóknar fjölda þjófnaðarmála og beinist rannsókn m.a. að mönnunum tveimur. Brot mannanna geta varðað fangelsi allt að 6 árum. Hæstiréttur staðfesti fyrir helgi gæsluvarðhaldsúrskurð sem kveðinn var upp yfir mönnunum 15. júlí og féllst ennfremur á kröfu um að þeir sættu einangrun. Héraðsdómur og Hæstiréttur féllust á það með lögreglu að rökstuddur grunur beinist að mönnunum um þátt eða hlutdeild í auðgunarbrotum. Þá var fallist á kröfu lögreglu um að tryggt yrði að mönnunum yrði gert ókleift að hafa samband sín á milli og samræma skýrslur sínar.

Úrskurðurinn rennur út klukkan 16 og virðist sem rannsókn málanna hafi gengið hratt fyrir sig því lögregla ákvað að krefjast ekki áframhaldandi gæsluvarðhalds.