Björgólfur Guðmundsson mbl.is/Kristinn Ingvarsson

Eftir Bjarna Ólafsson - bjarni@mbl.is

Eitt af málunum fimm, sem þrotabú Samsonar, eignarhaldsfélag Björgólfsfeðga, hefur höfðað vegna viðskipta sem áttu sér stað áður en Samson fór í greiðslustöðvun, er gegn Björgólfi Guðmundssyni sjálfum. Í stefnu er þess krafist að rift verði með dómi gjöf til Björgólfs í formi greiðslu Samsonar á eftirstöðvum á skuldabréfi sem Björgólfur gaf út sem stofnframlag í minningarsjóð Margrétar Björgólfsdóttur, dóttur sinnar. Er þess krafist að Björgólfi verði gert að greiða þrotabúi Samson rúmlega 111 milljónir króna.

Forsögu málsins má rekja til þess að Björgólfur og eiginkona hans stofnuðu í ársbyrjun 2005 minningarsjóð um dóttur sína. Stofnfé sjóðsins var 500 milljónir króna og var það greitt með skuldabréfi sem Björgólfur gaf út til sjóðsins. Stjórn sjóðsins skipa auk Björgólfs, dóttir hans Bentína Björgólfsdóttir og Þórunn Guðmundsdóttir hæstaréttarlögmaður.

Samson greiddi eftirstöðvarnar
Hinn 22. febrúar voru eftirstöðvar skuldabréfsins 111.047.411 krónur og sama dag sendi Sigþór Sigmarsson, stjórnarformaður Samsonar, bréf til Ágústs H. Leóssonar, framkvæmdastjóra Samsonar. Þar segir: „Bókhaldið í kringum þetta er kannski dálítið snúið [...] orðið hefur að samkomulagi að Samson greiði eftirstöðvar af skuldabréfi sem BG gaf upprunalega út sem stofnframlag í Minningarsjóð Margrétar Björgólfsdóttur.“ Í samræmi við fyrirmæli stjórnarformannsins voru þennan sama dag seldar úr peningamarkaðssjóði Samsonar 120 milljónir króna og voru þær notaðar til að greiða skuldina og eftirstöðvarnar lagðar inn á reikning Samsonar.

Riftanleg gjöf
Þrotabú Samson telur að ráðstöfunin hafi verið gjafagerningur og því riftanleg samkvæmt gjaldþrotalögum, en heimilt er að rifta gjöf ef hún var afhent síðustu sex til tólf mánuðum áður en þrotamaður leitaði fyrst heimildar til greiðslustöðvunar.