Makríll mbl.is

Íslensk skip hafa veitt rúmlega 90 þúsund tonn af makríl innan íslensku lögsögunnar í júní og júlí. Mestur hluti veiðinnar í sumar hefur verið út af Austfjörðum og Suðausturlandi.

Makríls hefur orðið vart í miklu magni víða umhverfis landið, nú síðast langt norður af Melrakkasléttu, þar sem íslensk skip hafa verið á veiðum á Norsk-íslenskri síld. 

Mestur hluti veiðinnar í sumar hefur verið út af Austfjörðum og Suðausturlandi og nú vikubyrjun fengu Faxi RE-9 og Lundey NS-14 drjúgt af makríl með síldinni.Virtist skipverjum sem makríllinn væri að éta talsvert af síld en skoðun í maga makrílsins leiddi það í ljós.

Fyrir nokkru var greint frá því að makríll hefði gengið inn í Breiðafjörð. Bæjarbúar í Ólafsvík mokveiddu makríl á stöng í höfninni. Fyrir stuttu var svo greint frá „kraumandi sjó af makríl“ við Vestmannaeyjar. Þá má geta þess að rannsóknaskipið Árni Friðriksson RE fékk makríl um 90 sjómílur SV af landinu fyrir nokkrum dögum.

Þótt makríls hafi orðið vart í einhverjum mæli á Íslandsmiðum fyrir mörgum árum hófust markvissar veiðar ekki fyrr en 2007. Þá veiddust um 30.000 tonnum. Á síðasta ári veiddust 112 þúsund tonn og í mars sl. heimilaði sjávarútvegsráðherra veiðar á allt að 112 þúsund tonnum á makríl á þessu ári.