mbl.is/Július

Tveir karlar á fertugsaldri voru handteknir í Reykjavík í gær eftir að fórum þeirra fundust munir sem þeir gátu ekki gert grein fyrir. Málin eru óskyld en annar mannanna hefur nú játað innbrot í miðborginni.

Karl um þrítugt var einnig handtekinn í Reykjavík í gær eftir að hann freistaði þess að komast með vörur úr stórmarkaði án þess að greiða fyrir þær. Samkvæmt upplýsingum lögreglu hafði maðurinn sett vörur í innkaupakerru sem hann var stöðvaður með fyrir utan verslunina.

Tvær unglingsstúlkur voru líka staðnar að hnupli í Smáralind í gær. Þær voru fluttar á lögreglustöð þaðan sem hringt var í forráðamenn þeirra.

Snemma í morgun voru síðan karl og kona á þrítugsaldri handtekin í Garðabæ eftir að í bíl þeirra fundust munir sem talið er að séu illa fengnir.

Nokkur innbrot voru einnig tilkynnt til lögreglunnar á höfuðborgarsvæðinu í gær. Brotist var inn í tvo bíla í Elliðaárdal og einn í Hafnarfirði en vegna þessa vill lögreglan ítreka að verðmæti séu ekki höfð í augsýn í ökutækjum.

Innbrotsþjófar voru líka á kreiki í miðborginni og stálu tölvu og bakpoka úr kjallaraíbúð. Gamall gítar og útidyramotta hurfu einnig frá leikskóla í vesturbæ borgarinnar og í austurborginni var veiðigræjum stolið úr geymslu verslunar- og þjónustuhúss.

Þá voru tölva, myndavél og áfengi tekið úr íbúð í Kópavogi og hljómflutningstækjum var stolið úr húsi í Mosfellsbæ. Verkfærataska var einnig tekin ófrjálsri hendi í miðborginni og í sama hverfi var bíl stolið síðdegis. Bíllinn fannst óskemmdur nokkru síðar en þjófurinn er ófundinn.

Karl um þrítugt var einnig handtekinn í Hlíðunum í gær en hann hafði brotið tvær rúður í fjölbýlishúsi. Maðurinn var fluttur á lögreglustöð en ekki er vitað hvað honum gekk til.

Rúður voru einnig brotnar hjá fyrirtæki í miðborginni í bíl í Breiðholti. Þá voru unnar skemmdir á tveimur bílum, öðrum í Grafarvogi en hinum í vesturbæ borgarinnar.