Lögreglumenn við umferðareftirlit.

Verulega fjölgun hegningarlagabrota í umdæmi lögreglustjórans á Suðurnesjum má meðal annars rekja til fleiri brota á bæjarhátíðum í umdæminu, en blíðskaparveður hefur verið á Suðurnesjunum í sumar og fleiri gestir hafa lagt leið sína á hátíðirnar en undanfarin ár. Þá hefur brotum vegna misnotkunar á ferðaskilríkjum fjölgað til muna.

Ríkislögreglustjóri birti nýverið afbrotatölfræði fyrir júnímánuð 2009. Þar kemur m.a. fram að hegningarlagabrotum hafi fjölgað verulega á Suðurnesjum, miðað við júnímánuð 2008, þ.e. úr 76 málum árið 1008 í 92 mál árið 2009.

Lögreglustjórinn á Suðurnesjum segir að þegar rýnt sé nánar í þessar tölur komi m.a. fram að fjölgun brota stafi annars vegar af brotum vegna misnotkunar á ferðaskilríkjum og hins vegar af fleiri brotum á bæjarhátíðum í umdæminu.

Bent er á að líkamsárásum í Keflavík hafi hins vegar fækkað á milli ára. Þá hafi fíkniefnabrotum fækkað úr 15 í júní 2008 í 9 í júní 2009.

Lögreglan á Suðurnesjum, í samstarfi við tollgæsluna á Keflavíkurflugvelli, hefur lagt hald á allt að 17 kílóum af fíkniefnum það sem af er þessu ári, en til samanburðar nam haldlagt magn efna innan við 15 kíló allt árið 2008.

Gríðarleg fjölgun varð á umferðarlagabrotum á milli ára 2007 og 2008, sem skýrist að mestu af tilkomu hraðamyndavéla við umferðareftirlit í umdæminu. Brotunum fækkar aftur verulega á þessu ári. Í júní 2007 voru umferðarlagabrot í umdæmi lögreglustjórans á Suðurnesjum 406, umferðalagabrotin voru 938 í júní 2008 en aðeins 276 í júní 2009.