Fjármálafyrirtæki í eigu ríkisins munu eftir sem áður þurfa að birta fjárhagsupplýsingar sínar opinberlega í lok hvers ársfjórðungs, samkvæmt drögum að eigendastefnu ríkisins í fjármálafyrirtækjum, sem unnin hafa verið í fjármálaráðuneytinu.

Þetta eru sömu reglur og gilda um fyrirtæki sem skráð eru á markaði. Segir í drögunum að með þessu verði best tryggt að opinber fjármálafyrirtæki verði eins gagnsæ og fyrirtæki sem skráð eru á almennum verðbréfamarkaði.

Í drögunum er jafnframt lagt bann við svonefndum starfandi stjórnarformönnum, í samræmi við frumvarp til breytingar á hlutafélagalögum, sem nú er til meðferðar á Alþingi. Gert er ráð fyrir að hin nýja ríkisstofnun, Bankasýsla ríkisins, kjósi stjórnirnar á hluthafafundum.

„Ákveðin hætta er á því að ríkið verði óvirkur eigandi sem leitt getur til þess að stjórnendur fyrirtækjanna fari að stýra þeim eftir öðrum markmiðum en eigandans,“ segir í drögunum.

Skilið á milli eiganda og eignar

Rík áhersla er einnig lögð á að skilja pólitísk afskipti frá daglegri starfsemi bankanna. Þannig skuli stjórn og starfsfólk Bankasýslu ríkisins hvorki taka þátt í daglegum rekstri bankanna né hafa áhrif á ákvarðanir þeirra. Skýrt skipulag skuli vera á samskiptum bankasýslunnar við bankana, svo staða hennar verði trúverðug.

Bann er lagt við því að stjórnir, bankaráð og stjórnendur fjármálafyrirtækja hafi beint samband við fjármálaráðherra eða ráðuneyti hans vegna atriða sem varða einstaka viðskiptavini þeirra.

Um laun stjórnenda segir að kjararáð ákveði laun bankastjóra og forstjóra fjármálafyrirtækja sem ríkið á meira en helmingshlut í.

„Opinber fjármálafyrirtæki skulu tileinka sér hófsemi þegar kemur að launakjörum.“ Laun eigi að standast samanburð á þeim sviðum sem fyrirtækin starfi á, en séu ekki leiðandi. Þá skuli búa til framgangskerfi fyrir starfsmenn innan fyrirtækjanna.

• Bankasýslan verði fjarri daglegum rekstri banka
• Bankar hafi ekki beint samband við ráðherra
• Bankarnir tileinki sér hófsemi í launakjörum