Norskar krónur.

Eftir Bjarna Ólafsson bjarni@mbl.is

Ákveðið hefur verið að framlengja í annað sinn svokallað Microsoft-gengi á krónunni, en samkvæmt því miðast viðskipti íslenskra fyrirtækja og almennings við Microsoft við að gengi evrunnar sé lægra en á markaði.

„Frá því í janúar hafa viðskiptin verið reiknuð út frá því að gengi evrunnar sé 120, en næstu sex mánuði verður miðað við gengið 130,“ segir Halldór Jörgensson, forstjóri Microsoft á Íslandi.

„Upphaflegar áætlanir okkar um gengisþróun íslensku krónunnar hafa ekki gengið eftir og við verðum að tryggja okkur fyrir því að hún haldist áfram svona lág. Við höfðum gert ráð fyrir því að gengisvísitalan yrði um 200 stig, en það hefur ekki haldist. Það ætti í raun ekki að koma neinum á óvart að Microsoft-gengið hækki, en það er enn sem fyrr mun lægra en markaðsgengi.“

Segir hann að allt frá því í janúar hafi viðskiptavinir Microsoft samtals sparað um einn milljarð króna. „Þegar erlendur gjaldeyrir er jafndýrmætur og raun ber vitni þá munar um þetta.“ Microsoft ber kostnaðinn af gengismuninum, en Halldór segir að hann sé þess virði. „Við höfum tekið þá stefnu að það sé betra að taka á okkur tap til skamms tíma í stað þess að tapa viðskiptum. Þetta er mikilvægur þáttur í því að halda viðskiptum á Íslandi og halda sambandi við viðskiptavini okkar og samstarfsaðila. Við lítum með öðrum orðum svo á að við högnumst á Microsoft-genginu. Hagnaður viðskiptavina okkar er ótvíræður.“

Gengi evrunnar er nú um 180 krónur, en var um 145 krónur í mars, þegar ákveðið var að framlengja Microsoft-gengið í fyrsta sinn.