Lögregla við hraðamælingar. Ragnar Axelsson

15 ára piltur var tekinn fyrir ölvunarakstur í Reykjavík um helgina. Hann hafði tekið bíl fjölskyldumeðlims í óleyfi og farið á rúntinn um bæinn í félagi við fjóra vini sína. Ökuferðinni lauk við fjölfarna umferðargötu þar sem pilturinn missti stjórn á bílnum og ók honum utan í grindverk. 

Meiðsli ökumanns og farþega voru minniháttar en ljóst þykir að betur fór en á horfðist. Líkt og áður sagði reyndist ökumaðurinn vera ölvaður og að sjálfsögðu án ökuréttinda. 

Þá stálu tvær unglingsstúlkur bifreið í höfuðborginni á sunnudagskvöld. Þær náðu að keyra nokkurn spöl áður en þær voru stöðvaðar í austurborginni. Stúlkurnar voru á bílastæði þegar lögregla hafði hendur í hári þeirra og reyndu að komast undan á hlaupum. Sú tilraun mistókst og hringt var í forráðamenn þeirra. 

Þá bar mikið á hraðakstri á höfuðborgarsvæðinu um helgina. Ökufantarnir voru gripnir víðs vegar í umdæminu og í alvarlegustu tilvikunum óku menn á 40-50 km hraða umfram leyfilegan hámarkshraða. Jafnan áttu ungir ökumenn í hlut eða piltar undir tvítugu. 

Í einhverjum tilvikum var um að ræða ökumenn sem óku með tengivagna við bifreiðar sínar. Einn slíkur var tekinn við borgarmörkin á um 110 km hraða en hann mátti með réttu ekki aka hraðar en á 70 km hraða.

Þá voru sjö teknir fyrir ölvunarakstur á höfuðborgarsvæðinu um helgina. Af þeim voru sex karlar á aldrinum 15-26 ára.

Tveir voru teknir fyrir að aka bifreið undir áhrifum frá vímuefnum um helgina. Sá þriðji var svo gripinn í gærkvöld. 18 ára drengur hafði tekið bíl traustataki í Hafnafirði og sest við stýrið undir áhrifum fíkniefna. Bílferðin tók þó skjótan endi í grasbrekku utan vegar. Ökumaður og farþegar hlupu af vettvangi en ökumaðurinn var handtekinn skömmu síðar.