„Það voru engir Íslendingar í hættu vegna þessarar sprengju," sagði Maria Perelló, fararstjóri Heimsferða á Mallorca í samtali við mbl.is. Hennar farþegar eru allir á hinum enda eyjunnar og urðu ekki varir við sprengjutilræði sem eignað hefur verið aðskilnaðarhreyfingu Baska, ETA.

María sagði að öll umferð hefði meira og minna stöðvast á og í grennd við hraðbraut eyjunnar því lögregla og her stöðvi nú alla bíla og leita í þeim. „Maður kemst ekki upp á hraðbrautina og það eru þyrlur fljúgandi hérna yfir meira og minna stöðugt," sagði María sem býr í næsta bæ við Palmanova þar sem tilræðið var framið.

Hún sagðist reikna með að samgöngur yrðu komnar í samt lag á miðvikudaginn í næstu viku þegar von væri á tveimur íslenskum útskriftarhópum til eyjunnar.

Allir farþegar á vegum Heimsferða eru á Cala D'Or og eins er hópur Íslendinga á Playa de Palma sem er nær tilræðisstaðnum. „Sem betur fer er enginn íslendingur á þessum slóðum," sagði María.

Hún sagði að tilfinning eyjaskeggja væri sú að þetta tilræði væri vel skipulagt og að tilræðismennirnir hefðu forðað sér brott af eyjunni á báti því þeim hefði mátt vera ljóst að höfnum og flugvöllum yrði lokað með hraði.

„Það er talað um það í fjölmiðlum hér að ETA sé að syngja sitt síðasta og að sprengingarnar nú og í vor séu í raun dauðakippir þessarar hryðjuverkahreyfingar," sagði María að lokum.