Nýr Guttormur verður afhjúpaður í Fjölskyldu- og húsdýragarðinum á sunnudaginn en sem kunnugt er brenndu skemmdarvargar útilistarverkið Guttorm þann 9. júlí. Hinn endurgerði Guttormur mun hafa aðsetur sitt í garðinum en flakka um Laugardalshverfið þegar eitthvað stendur til.

Endurgerð Guttorms byrjaði strax í vikunni eftir að fyrra verkið var brennt. Var verkið unnið í Fjölskyldu- og húsdýragarðinum af starfsmönnum garðsins sem og eitthvað af þeim krökkum sem komu að gerð eldra verksins. Lagði Húsasmiðjan til efni, Atlantsolía smið og Reykjavíkurborg aðstöðuna og mannafla. Unnur Sigurþórsdóttir, deildarstjóri fræðsludeildar í Fjölskyldu- og húsdýragarðinum sagði að fyrir hefðu legið bæði teikningar og leirmódel og smíðin því gengið vel. Búið væri að leggja blessun sína yfir verkið af hálfu þeirra sem komu að fyrra verkinu.

„Nýi Guttormur er auðvitað ekki alveg eins,“ segir Unnur. „Efniviðurinn er þannig að það er ekki hægt. Hann er bara mjög flottur og ekki síðri en hinn.“ Á sunnudaginn verður Guttormur í nánd við tónleikastað Stuðmanna í garðinum en eftir það verður honum fundinn góður staður. Þegar eitthvað stendur svo til í hverfinu verður honum rúllað þangað á nýju hjólunum.

Búið er að úða Guttorm með eldvarnarefni svo ekki verði hægt að kveikja í honum.