Bongóblíða er nú í Herjólfsdal í Vestmannaeyjum þar sem barnadagskrá er að hefjast. Kökur og kaffi eru á boðstólum í hvítu tjöldunum og skín gleðin af hverju andliti.

Veðurguðirnir leika við hvern sinn fingur í Vestmannaeyjum og rjómablíða er í Dalnum en þar er barnadagskráin að hefjast. Er hún leidd af mikilli röggsemi af Erni Árnasyni. Hámark hennar er söngvakeppni barnanna sem hefst klukkan 16 en þar keppa um tuttugu börn, tíu ára og niður úr. Er keppnin árlegur viðburður og nýtur mikilla vinsælda.

Páll Scheving sem situr í þjóðhátíðarnefnd segir síðastliðna nótt hafa verið rólegri en þá á undan. Hressilegir skúrar hafi dunið yfir um fjögur leytið og hafi þeir sennilega sent marga í bólið. Hann segir að hitinn sé mikill í Dalnum, á milli 15 og 20 stig. „Núna er þetta aðallega fjölskyldufólkið sem er inni í Dal, menn fara á milli tjalda og fá sér kaffi og kökur og margt er í boði fyrir krakkanna.“ Unga fólki sé nú aðallega í bænum þar sem þéttsetið er á hverju kaffihúsi, veitingahúsi og krá.

Hann segir menn vera orðnar mjög spennta fyrir kvöldinu. „Það stefnir í að þetta verði stærsti brekkusöngur frá 1874 og sumir giska á að þarna verði hátt í fimmtán þúsund manns að syngja,“ segir Páll sem lofar frábærri skemmtun. Enda ólíklegt að annað verði uppi á teningnum þegar KK, Bubbi, Land og synir, Skítamórall og Hjálmar stíga fram á svið, að ógleymdum Árna Johnsen sem mun að sjálfsögðu leiða sönginn eins og honum einum er lagið.