Gísli og félagar róa að Geldinganesi. Eggert Jóhannesson

Gísli H. Friðgeirsson kom í land við Geldinganes skömmu fyrir klukkan 18:30. Lauk hann þar með hringferð sinni kringum landið sem hófst þann 1. júní. Er hann fyrsti Íslendingurinn sem rær kajak þessa leið.

Nokkrir tugir manna tóku á móti Gísla og sungu Kátir voru karlar þegar ræðarinn gekk á land. Með honum í för voru nokkrir félagar hans sem slógust í förina á Álftanesi og reru með honum lokaspölinn. Þegar komið var að landi beið svo uppdekkað borð og voru kræsingarnar vel þegnar.

„Mér líður mjög vel, þetta er svolítið eins og eftir próf eða eitthvað slíkt, þægileg hvíldartilfinning“ sagði Gísli þegar hann hafði heilsað vinum og vandamönnum sem tóku á móti honum við landgönguna. „Ég er mjög sáttur.“

Gísli lagði af stað í för sína þann fyrsta júní sl. og hefur síðan þá skroppið tvisvar sinnum heim, einu sinni frá Ísafirði og svo frá Vík, en þá var sonurinn að gifta sig og ekki hefði dugað að missa af brúðkaupinu.  Hann hefur því verið fjarverandi í 63 daga.

„Það sem stendur upp úr varðandi ferðina er að takast á við svona stóra áskorun og standast hana,“ segir Gísli. Það þurfi mikið úthald til að klára svona dæmi, bæði andlegt og líkamlegt. Það erfiðasta sem Gísli lenti í á ferðinni segir hann vera landtöku við Kúðafljót og að fara frá landi aftur, ekkert nema sandur og brimið talsvert.

Gísli fer í vinnuna á morgun, eins og ekkert hafi í skorist, en ætlar að taka því rólega á næstunni, að vera í réttri líkamsrækt en ekki erfiðri. Gísli telur sig hafa fengið mikið út úr ferðinni. „Það eykur lífsgleðina að takast á við krefjandi verkefni og sigrast á þeim,“ segir Gísli að lokum.

Fyrstir til að róa kajak umhverfis landið voru tveir Bretar árið 1977.

Gísli í Eyjum mbl.is

Gísli við Dyrhólaey mbl.is