Skipuleggjendur hátíðahalda verslunarmannahelgarinnar eru ánægðir með hvernig til tókst. Einstaklega gott veður var á Akureyri og í Eyjum. Og börnin fengu að taka þátt í mýrarbolta á Ísafirði.

Annað árið í röð slær þjóðhátíð í Eyjum aðsóknarmet, að sögn Tryggva Más Sæmundssonar, sem situr í þjóðhátíðarnefnd. Var þetta langstærsta hátíðin þessa verslunarmannahelgina. Hann segir að 13.500-14 þúsund manns hafi mætt, sem er að hans sögn töluvert meira en í fyrra, en þá voru um 13 þúsund á þjóðhátíðinni.

„Mýrarboltinn var stórgóður“

„Frábær helgi að baki. Mýrarboltinn var stórgóður í ár,“ segir Jóhann Bæring Gunnarsson, einn skipuleggjenda Mýrarboltans á Ísafirði. Hann sagði að um 600 manns hefðu keppt og haft gaman af, en um tvö þúsund manns mættu á svæðið. Jóhann segir að þurft hafi að hætta við sápubandí fyrir börnin á laugardeginum en í staðinn hafi þau fengið að taka þátt í mýrarboltanum á sunnudeginum. „Foreldrarnir réðu ekkert við það,“ svarar hann aðspurður. „Börnin vildu ólm komast inn á völlinn.“

Skemmtilegt Abbaþema

Margrét Blöndal, skipuleggjandi hátíðarinnar á Akureyri, Einnar með öllu – og allt undir, er mjög ánægð með hvernig til tókst um helgina. „Abbaþemað var ofboðslega skemmtilegt,“ segir hún en það fór mest fyrir því á laugardeginum. „Það sem stendur upp úr er góð mæting á alla viðburði,“ segir hún en getur ekki sagt til um hve margir mættu, því miðar voru ekki seldir á hátíðina. Hún sagði gesti búsetta á Akureyri, brottflutta Akureyinga og þá sem leita eftir ljúfri og góðri fjölskyldustemningu. „Hér var svo sannarlega fjölskyldustemning. Það tókst í fyrra og hér með sannaðist að við vorum ekki bara heppin einu sinni,“ segir hún.