Mikil þátttaka í ferðum Ferðafélags Íslands í sumar og metaðsókn að skálum félagsins kallar á uppbyggingu á þeim svæðum þar sem félagið hefur helgað sér land í tímans rás. Byggja þarf nýja skála og stækka þá sem fyrir eru, bæta tjaldsvæði og hreinlætisaðstöðu og merkja gönguleiðir.

Þetta segir Páll Guðmundsson, framkvæmdastjóri FÍ, sem telur að aldrei hafi fleiri tekið þátt í starfi félagsins en einmitt í ár. Lauslega áætlað hafi til að mynda um tíu þúsund manns gengið Laugaveginn sem sé tvö til þrjú þúsund göngugörpum fleira en í meðalári.

„Vegna aðstæðna í efnahagslífinu bjuggumst við í FÍ, eins og aðrir, við því að ferðalög hér innanlands ykjust og að starfsemi félagsins efldist. Hvort tveggja hefur gengið eftir. Vinahópar og sumarklúbbar til dæmis, sem að öðru jöfnu hefðu líklega farið utan, hafa þetta árið haldið sig hér heima: gengið á fjöll eða farið um óbyggðir. Þetta er skemmtileg þróun sem ég tel allar líkur á að haldist áfram. Og þessu verðum við að bregðast við með nauðsynlegum framkvæmdum sem við munum að sjálfsögðu forgangsraða,“ segir Páll Guðmundsson.

Laugavegurinn er vinsælasta gönguleið landsins. Á þeirri leið á FÍ fimm skála, það er í Landmannalaugum, Hrafntinnuskeri, við Álftavatn, í Hvanngili, á Emstrum og í Þórsmörk. Aðrar gönguslóðir eru þó að koma sífellt sterkar inn, svo sem Hornstrandir, Kjalvegur hinn forni og leiðin um Jarlhettuslóðir við sunnanverðan Langjökul sem opnaðist fyrir fáum árum með brú yfir Farið við Hagavatn.