Mynd ferlir.is

Lagning nýs ferðamannavegar um hverasvæðið við Gunnuhver á Reykjanesi, er ekki háð mati á umhverfisáhrifum, samkvæmt ákvörðun Skipulagsstofnunar.

HS Orka hf, Ferðamálasamtök Suðurnesja, Grindavíkurbær og Reykjanesbær, áforma að leggja nýjan veg um hverasvæðið við Gunnuhver í stað vegarkafla sem hefur verið lokað vegna aukinnar
hveravirkni á svæðinu. Vegurinn verður innan svæðis á Náttúruminjaskrá, um 1,5 kílómetra langur frá Reykjanesvitavegi, sunnan við Gráa lónið og austur fyrir hverasvæðið við Gunnuhver.

Skipulagsstofnun leitaði álits Grindavíkurbæjar, Reykjanesbæjar, Fornleifaverndar ríkisins, Ferðamálastofu, Heilbrigðiseftirlits Suðurnesja og Umhverfisstofnunar. Umsagnir bárust frá Grindavíkurbæ, Reykjanesbæ, Fornleifavernd ríkisins, Heilbrigðiseftirliti Suðurnesja og Umhverfisstofnun. Umsögn barst ekki frá Ferðamálastofu.

Tilgangur framkvæmdanna er annars vegar að gera nýja akstursleið um hverasvæðið við Gunnuhver og hins vegar að bæta öryggi og aðstöðu ferðamanna og útivistarfólks sem skoðar hverasvæðið á Reykjanesi.

Grindavíkurbær, Reykjanesbær, Fornleifavernd ríkisins, Heilbrigðiseftirlit
Suðurnesja og Umhverfisstofnun telja ekki líklegt að framkvæmdin muni hafa umtalsverð umhverfisáhrif.

Áhrif á náttúruminjar

Í umsögn Umhverfisstofnunar kemur fram að fyrirhugað vegstæði sé innan svæðis á náttúruminjaskrá (Reykjanes, Eldvörp og Hafnaberg), sem einkennist af stórbrotinni jarðfræði, fjölskrúðugum jarðhitagróðri og sérstæðri volgri sjávartjörn. Fyrirhugað framkvæmdasvæði sé í jaðri iðnaðarsvæðis á Reykjanesi þar sem ummerki mannsins séu mikil og fyrirhugað vegstæði sé að stærstum hluta á röskuðu svæði. Ekki séu líkur á að vegalagningin hafi mikil áhrif á fuglalíf.

Áhrif á fornleifar

Í umsögn Fornleifaverndar ríkisins kemur fram að rétt sé að fornleifar séu sunnan Gráa lónsins, en í gögnum sé staðsetning þeirra ekki sýnd á loftmynd og afstaða þeirra til legu fyrirhugaðs vegar sé ekki ljós. Hins vegar sé í frummatsskýrslu vegna stækkunar Reykjanesvirkjunar sýndur slóði sem liggi frá Reykjanesvitavegi og yfir á núverandi varnargarð við Gráa lónið, en einungis á þessum hluta fyrirhugaðs ferðamannavegar liggi fornleifar nærri veginum. Fjórar fornleifar séu í 40 -70 m fjarlægð frá slóðanum: garðlag og þrjár tóftir. Ef framkvæmdin feli í sér að byggja upp gamla slóðann ætti fornleifum ekki að stafa hætta af henni. Engu að síður sé mikilvægt að verktakar verði upplýstir um staðsetningu fornleifanna til að koma í veg fyrir að þær raskist af vangá meðan á framkvæmdum standi.

Umhverfismats ekki þörf

Skipulagsstofnun telur ljóst að helstu neikvæðu áhrif fyrirhugaðra framkvæmda verði vegna röskunar jarðmyndana og gróðurs á um 250 metra kafla vegarins. Þá telur stofnunin að framkvæmdin muni bæta aðgengi og öryggi ferðamanna á hverasvæðinu.

Það er niðurstaða Skipulagsstofnunar að gerð nýs vegar um hverasvæðið við Gunnuhver á Reykjanesi sé ekki líkleg til að hafa í för með sér umtalsverð umhverfisáhrif og skuli því ekki háð mati á umhverfisáhrifum.

Framkvæmdirnar eru háðar framkvæmdaleyfi Grindavíkurbæjar og Reykjanesbæjar og telur Skipulagsstofnun mikilvægt að verktakar verði upplýstir um staðsetningu fornleifa á framkvæmdasvæðinu til að koma í veg fyrir að þær raskist af vangá meðan á framkvæmdum stendur.

Ákvörðun Skipulagsstofnunar má kæra til umhverfisráðherra og er kærufrestur til 8. september 2009.

Vefur Skipulagsstofnunar

Fróðleikur um Gunnuhver