Lögregla vísaði í dag burt hústökufólki sem sest hafði að í húsi á Skólavörðustíg. Um er að ræða sama hóp fólks og áður hafði sest að í Vatnsstíg 4.
Húsið að Skólavörðustig hefur verið autt í talsverðan tíma. Lögreglu bárust kvartanir vegna ónæðis frá hústökufólkinu og eigandi hússins setti sig í samband við lögreglu og upplýsti að hann hefði ekki gefið fólkinu leyfi til þess að búa í húsinu.
Lögregla ákvað því að stugga fólkinu burtu og fór aðgerðin friðsamlega fram. Sami hópur lenti hins vega í átökum við lögreglu þegar ákveðið var að rýma Vatnsstíg 4 fyrr á árinu. Óeirðasveit lögreglunnar var þá kölluð til og voru nokkrir úr hópnum handteknir.
Eigandi hússins að Skólavörðustíg hyggst nú loka því tryggilega svo hústökufólk eða aðrir óviðkomandi geti ekki farið inn.