Innlent | mbl | 9.8.2009 | 11:12 | Uppfært 17.12.2009 15:38

Funda síðdegis um breytingartillögu

mbl.is/Eggert

Ráðgert er að fulltrúar allra stjórnmálaflokkanna í fjárlaganefnd hittist kl. 16 í dag til þess að fara yfir breytingartillögur við frumvarpið um Icesave-samninginn.

Að sögn Guðbjarts Hannessonar, formanns fjárlaganefndar, er hér um óformlegan vinnufund að ræða, en ætlunin er að kalla fjárlaganefnd saman í heild sinni í fyrramálið. Sagðist hann ekki gera ráð fyrir að frumvarpið yrði afgreitt úr nefndinni á morgun.

„Það er komið uppkast að breytingartillögu við frumvarpið sem menn fá til skoðunar í dag, en það er bara fyrsta uppkast þannig að menn eiga örugglega eftir að kasta því á milli sín,“ sagði Guðbjartur í samtali við mbl.is.

Inntur eftir því hvort menn séu að ná saman í fjárlaganefndinni segir Guðbjartur enn ekki fyllilega hafa reynt á það ennþá. „Menn hafa verið að skoða efnahagsþáttinn í þessu og sú vinna klárast líklega í dag eða á morgun. Og þá á eftir að púsla þessu saman þannig að það sér ekki alveg fyrir endann á því.“

Spurður hvort hann teldi breytingartillögurnar þess eðlis að Icesave-samningnum væri sjálfkrafa hafnað svarar Guðbjartur því neitandi. „Okkar breytingartillögur ganga út á það að samningurinn verði samþykktur, en það verði tryggð þau atriði sem menn hafa verið óánægðastir með. Það verði reynt að tryggja þau þannig að þau lifi til frekari skoðunar.“