mynd/LHG

Landhelgisgæslan vísaði togaranum Sólbaki EA til hafnar á Akureyri snemma í morgun vegna fiskveiðibrots. Skipstjórinn var staðinn að ólöglegum veiðum norðvestur af landinu í gær að sögn Gæslunnar. Yfirmenn togarans verða teknir til skýrslutöku hjá lögreglunni seinna í dag.

Þá var báti vístað til hafnar í Ólafsvík í gær þar sem hann var við ólöglegar handfæraveiðar á Breiðafirði í gær.

Lögreglan hefur tekið skýrsla af skipstjórum og lagt hald á afla, gögn og búnað.

Varðskip stóð Sólbak að meintum ólöglegum togveiðum í hólfi á Vestfjarðamiðum þar sem áskilið er að hafa svokallaða smáfiskaskilju eða ákveðna lágmarskmöskvastærð. Um hádegi í gær kom varðskipið að skipinu og voru eftirlitsmenn sendir um borð í togarann til að kanna veiðarfæri og gögn skipsins.

Við skoðun eftirlitsmanna varðskipsins á veiðarfærum togarans kom í ljós að skipið var ekki búið svokallaðri smáfiskaskilju eða hafði þá lágmarksmöskvastærð sem áskilin er á þessu svæði.  Meðalmöskvastærð trollpokans var undir þeirri lágmarksstærð sem áskilin er á svæðinu sé ekki notuð smáfiskaskilja.  Var skipinu vísað til hafnar þar sem málið verður tekið fyrir. Tók lögreglan á móti skipinu þegar það lagði að bryggju á Akureyri kl. 5:30 í morgun.

Handfærabáturinn var staðinn að meintum ólöglegum handfæraveiðum innan bannsvæðis suður af Látrabjargi. Þyrla Landhelgisgæslunnar TF-Líf kom að bátnum og sást greinilega að báturinn hafði veiðarfæri sín í sjó.

Skipstjóra bátsins var tilkynnt að bátnum yrði vísað til hafnar þar sem mál hans yrði tekið fyrir. Sigldi báturinn til hafnar í Ólafsvík þar sem lögreglan tók á móti honum um kl. 18 í gær. 

Yfirmenn skipanna verða teknir til skýrslutöku í dag innan embætta sýslumannsins á Akureyri og sýslumannsins á Snæfellsnesi.